В домовнем обиходе и везде всякому человеку, государю или государыни, сыну и дщери, или слугам, мужску полу и женску, и всякому мастеровому человеку, стару и малу, и учеником всякое дело начати и рукоделничяти: или ества и питие варити, и печи что, и всякие приспехи делати, и всякое рукоделие и мастерство, устроив себя и очистив от всякие скверны, и руки умыв чисто, преж - святым покланятися 3 ж в землю, а по нуже, ино до пояса, а хто умеет, ино "Достойно есть" проговорити, да благословяся у настоящаго, да молитву Иисусову проговоря, да, прекрестяся, молвя: Господи, благослови Отче,- то ж начяти всякое дело, ино тут Божия милость поспешствует, и Аггели невидимо помагают, а беси отбегнут, н то дело Богу в честь, а души на ползу.
   А ести и пити з благодарением - ино сладко; а что в прок зделано, ино мило, а делати с молитвою и з доброю беседою, и с молчянием, а делаючи что ни буди, начнетца слово празное и хулное, или с роптанием, или смех, или кощуны скверныя и блудныя речи, и песни бесовския, и игры,- от такова дела и беседы Божия милость отступит, и Аггели отидут скорбни, и возрадуються беси, видяще волю свою съдевающу безумнии християне. И приступят лукави, влагающа в мысль всякую злобу, вражду и ненависть, и подвизают помысл на блуд и на гнев, и на всякие кощуны, и сквернословие, и на всякое зло,- ино то уже дело, и ества, и питие не споро, и всякое мастерство и рукоделие не о Бозе совершается, Богу на гнев, а людей не благословено, и непотребно, немило, и непрочно, а ества и питие неукусно и несладко, толке врагу и его слугам угодно и радостно. А хто в естве и в питии, и во всяком рукоделии не чисто стряпает, а в мастерстве что украдет, или подмешает, или подменит что, или прилжет, и божитца накриве: не толке зделано и в не толке стало, а он лжет,- и те все дела неугодны Богу, беси написуют, и в том во всем человеку истязану быти в день страшнаго суда. А государю неверно, а людем непотребно, и вперед нихто тому не верит. А что выделал непрямо или прилгал и выбожил, или приторговал лукавством,- то не благословенны плоды, и не прочны, а милостыня Богу не приятны. А от праведных трудов и от благих плод и себе прошно, а Богу в дар принести достойно, и милостиня Богу приятна, и таковыи человек Богу угоден и людем честен, и всяк ему во всем верит: в сем веце добрыми делы Богу угодит, а в будущем веце в веки царствует.