По сем же возлюби Господа Бога твоего от всея душа своея и от всея крепости своея, и подвигни вся дела твоя и обычяи и нравы угодная творити Господеви. Паки ж искреняго си возлюби, всякого человека, по образу Божию созданнаго, рекше всякого христианина. Страх Божий всегда имей в сердци своем и память смертную, и любовь нелицемерную ко всем. Всегда волю Божию твори и по заповедем Его ходи. Рече Господь: в чем тя застану, в том и сужу, ино достоит всякому христианину готову быти в добрых делех, в чистоте и в покаянии, и во всяком исповедании, всегда чяюще часа смертнаго. О том же бо. Возлюбиши Господа от всея душа, и страх Его да будет во сердци твоем. Праведен буди, и истинен, и смирен, очи долу поницая, ум же к небеси простирая, умолен к Богу, и человеком приветлив, печялнаго утеши, терпелив в напастех, и недосадитель, всякому человеку щедр, милостив, нищекормец, странноприимник, скорбен греха ради, весел о Бозе, ни алчен буди от пияньства и жаден от обьядения, кроток, неславохотен, незлатолюбец, но друголюбець, негорд, боязнив пред царем, готов в повелении его, во ответех сладок, чясто молитвеник. разумен, трудник к Богу, и неосудник всякому человеку, поборник обидимым, нелицемерен, чядо Евангелия, сын Воскресения, наследник будущия жизни, о Христе Иисусе Господе нашем, Ему ж слава во век.