Царя бойся, и служи ему верою, и всегда о нем Бога моли. И ложно отнюд не глаголи пред ним, но с покорением истину отвещаи ему, яко Самому Богу, и во всей повинуйся ему. Аще земному царю правдою служиши и боишися его, тако научишися Небеснаго Царя боятися: сей временен, а Небесный превечен, и Судия нелицемерен, и воздаст комуждо по делом его. Тако ж и князем покаряися, н должную честь воздавай им, яко от него посланом в отомщение злодеем, в похвалу ж добродеем. Князю своему прияи и властелем своим, ни помысли на ня зла. Глаголет бо Павел апостол: вся владычества от Бога учинена суть,— да аще кто противится властелем, той Божию повелению проти­вится. А царю и князю и всякому велможи не тщися служити лжею и кле­ветою и лукавством, погубит Господь вся глаголющая лъжу, а шепотники и клеветники от народа прокляти суть. Старейшим себе честь воздавай, поклонение твори, средних яко братию почитай, маломожных и скорбных любовию привечай, юнеиших яко чяда люби — всякому созданию Божию не лих буди. Славы земныя ни в чем не желай, вечных благ проси у Бога, всякую скорбь и тесноту з благодарением терпи, обидим — не мсти, хулим — моли, зла за зло не воздавай, ни клеветы за клевету; съгрешающая не осужаи, воспомяни своя грехи, о тех крепко пекися, злых мужей совету отвращаися, буди ревнитель правоживущим и тех делания написуи в сердци своем, а сам тако ж твори.