Годовои обиход домовиту человеку, мужу и жене, и у кого поместья и пашни, и сел, и вотчины нет, ино купити годовой запас, хлеб и всякое жито, зиме на возех, а полтевое мясо, тако же и рыбу вся­кую, и длинную, осетрину на провес, и бочесную в год, и семжину, икру сизовою и черную, и мед пресной, и которая рыба в лето ставити и капуста,— и те суды зиме в лед засекати, и питие запасное, глубоко, и, покрыв лубом, засыпати. Или надобе лете — тогды свежо и готово.
А в лете мясо ясти, покупати домовитому человеку, купити боранца, а дома облупити, а овчинки скопити человеку на шубку, а боранеи потрох— прибыль, в столе потешение. У порядливой жены или у добра повара много примыслу: из грудины ушное нарядити, почки — начинити, лопатки — изжарити, ношки яички начинити, печень иссекши с луком, перепонкою обертев, изжарити на сковороде, лехкое тако ж, с молочком, с мукою, сь яички приболтав налет, а кишечки яички налет, бораню голову, можжок, с потрошком уху нарядит, а рубець кашкою начинит, почесные чясти — сварити или, на­чинив, изжарити,— и как делати, из одного борану много прохладу. А студень на леду держати хорошо, что останетца...
А свиньи доморощеные в осень бити, потому ж, полти в год осолити, а голова и ноги и сало, и желудки, и кишки, и потрох, и спина в осень и в зиму пригодитца; у промышленого мужа и упромышленые жены, и у доб­рые порядни во всем спорыня, а всегды прохлад себе и семье, и гостем. А неубыточно: по что в торг, и ты в клеть.
А гуси и утки и куры кто дома водит, и толке у воды, ино вскормит лете ничимже; а на год з запасом з даровым. А кто про себя коровы держит дойные, лете корм на поле, а дома всякого корму много у доброй порядни, и лете и зиме, гуща пивная и киселная, и квасная и кислых штеи и отрубей овсяных, и высеики ржаные и пшенышные, и ячные, и заспу делаючи и то­локно. И в осень капусту солят, и свеклу ставят, и репу, и морковь запасают…