44.
КАК СЕБЕ НА ОБИХОД КУПИТИ ВСЯКОЙ ТОВАР ЗАМОРСКОЙ
ИЗ ДАЛНЫХ ЗЕМЛЪ

А бобр у гостя целой купи, или два и три, колке хощешь, да и зделати дай: дома на все пригодитца, а у рубля полтина збудеться. А тафты косяк, а сукна постав, или розных поставцев шолку, литрою золота и серебра потому ж, или белка, или песец, и всякой запас, коли чему навоз, и по своему обиходу смотря, и по промыслу, и по рукоделю и по своей семье, и по своему прожитку, тако и покупати запас, коли чего много и дешево, и по рукоделником, и по мастерицам, - ино споро и прибылно. А толке лучитца свои мастерок портной и сапожной, и плотник, и во всяком запасе, и в остатках, и в обрескох прибыль будет, или к новому портищу остатки пригодятца или к ветчянему починит, а ты того не прикупаешь.
     А лес и дрова, и бочки, и мерники, и скалы, и дубник, и лубье, и липняк, и доски, и драници, и жолобы, коли тому навоз, в зиме на возех, а весне на плотех и в лодях - на год запасешь: у всего не додашь, у рубля четверть збудетца. А у прасола, коли занадобитца, не любое купишь, а денег слишком дашь; а всякой товар и запас, коли ему навоз всякому товару, а дешево: хоти ненадобе, а в ту пору купи - а свою нужу исполнишь, а чего запасено слишком, на том денгы дадуть с прибылию.



Оглавление


Новый Домострой

на Главную страницу
на Главную
© Sergey I. Kravchenko 1993-2022
eXTReMe Tracker