А который служка в котором приказе бережен и по наказу живет, и в службе чясто ходит, бесхитростно, за посмех не отдаст, и сам не украдет, а везде ества и питье, и всякая потреба покрыто и не изгнило, и не поплесньвело, и не прокисло, и везде подметено, и вытерто, и не намочено, и не налито, и не нагрязнено, и не насорено, и суды всякие чисты, и перемыты, и устроено хорошо, и ества и остатки перебрано цело,- и вперед блюсти про государя и про гость, а понятое в росход давать и в стол кому достойно что и как ему велено от государя. И во всякой службе кто добро и брежно и бесхитростно служит, по приказу чинит, того пожаловати и добрым словом привечяти, и ести и пити подати, и нужа его всякаа исполнит. А чего безхитростно или недогадкою и неразумием негораздо зделал и попортил что - и в том словом наказати перед люди всеми, все б того береглися, ино отдати. А в другие и в третие проступит или ленитца - ино, по вине и по делу смотря, по разсужению наказати и побити: доброму бы была честь, а худому - наказание, а всему тому наук. А государыня жонок и девок в своем обиходе тако ж збирает и смечяет и спрашивает, и жалует и наказует - тако ж, как зде писано.