А на погребех и на ледникех, и в житницах, и в сусилех, и в клетех, и в анбарех, и в конюшнях по вся дни у ключника вечере, а в кои любо день пересмотрети самому государю всякого питья и ествы, и всякого обиходу, и запасу, и рухляди, и в конюшне, и в хлебне, и в поварне, и в чьем приказе: иль у ключника, и у повара, и у хлебника, и у конюха,- и у всех пересмотрети, по тому ли чину устроено, ино как в сей памяти писано, и попытати колке чего есть, н всему ли есть счет и мера и писмо. Да все то сметити и згадати самому: или колке чего зделано, и сколке чего розошлося, и кому что отдано, и коли что съедено и испито,- и все б то умели сказати имянно. Иного вечера у ключника, иного вечера повара, иногды хлебника, ино вечера пивовара и конюха смотрети и сметить всем всех, а ключнику тут же быти. И толко везде стройно по наказу и соблюдено, и счет соидетца, и устроено хорошо, и счет отдаст подлинно и прямо и памятно - ино того за его службу жаловати; а кто небреженем или истерял и испортил, и солгал, и покрал, ино посмотря по вине, наказывати и пеня чинить.