А ко всякому рукоделю у мужа и у жены всякая бы порядня и снасть была в подворие: и плотницкая, и портного мастера, и железная и сапожного; и у жены бы тако ж, ко всякому рукоделю и домовному обиходу, всякая бы была порядня своя, и держано бы то брежно, где што пригоже, ино что ни зделано себе - нихто ничего не слыхал: в чюжеи двор не идешь ни по што, свое есть.
    А поваренная порядня и хлебная, и пивоварная все бы было у себя сполна: и медяное, и оловяное, и железное, и деревяное, - и каково ся лучит. А лучитца у кого кая ссуда взяти, или свое дати: скрута ження, сажение и мониста, или свое дати: плате мужское или судно сребряно, и медяно, и оловяное, и деревяное, и какой ни буди запас,- ино пересмотрити, и нового и ветшаного: где измято или избито или утло, а плате ли изваляно, и подралося, или которая нат чем ни буди притчя, и что не цело,- и все то исчести, и сметити, и записати, и хто емлет и хто дает - обема то было бы в ведоме.
    А што весовое, то звесити, и всякой ссуде цена поставлена; по грехом какова притчя станетца, ино на обей стороны хлопотов и остуды нет,- и тому платеж, у кого взято. А всякая ссуда имати и давати в честь, и бречи паче своего, и отнести на срок, што бы сами государи того не просили и по то не посылали: ино вперед дадут, и дружба в прок.
     А толке чюжего не беречи, и на срок не отнесть, или испортив отдати, ино остуда в прок, и убыток и продажа в том живет, и вперед никто ни в чем не верит.