А по вся дни государыня у слуг дозирает, которые пекут и варят, и всякие приспехи делают, и которые рукоделе делают; и которая служка хорошо што зделает по приказу: или сети сварит, и хлебы испечет, колачи, и пироги, или какой ни буди приспех, или какое рукоделе зделает добро,— и за то служка примолвити и пожаловати ести подати, и по преж писаному: как дворовым людем от государя брежение, и по службе смотря. А хто худо не по приказу зделает или не слушает, или ленитца, или испортит что, и нечисто стряпает, и украдет,— ино по преж писаному ж наказанию учити, как от государя слугам живет; впреди о том наказание писано, как кого пожаловати и наказати, и поучити. А в горници, и в комнате, и в сенех и на крилце всегда бы было чисто, и рано и поздо, а стол и суды всякие всегда мыти чисто, и скатерть— чиста. А сама бы государыня всегда была устроена, во всяком обиходе, таковы бы у нее и слуги были вежливы, по преж писаному. А с слугами бы государыня пустошних речей, ни пересмешных, ни безлепичных, ни соромских отнюд не говорила, ни торговки, ни безделные жонки, ни бабы, ни волхвы никако ж во двор не приходили, понеж от тех много зла чинитца, слугам потвор. Аще ли в кои начнуть двор сицевые приходити, а государыня о сицевых слуг своих не возбраняет, а и сама их начнет привечяти, первие учинят слуг крадливых, потом — и блядливых. Аще ли и сама государыня не уцеломудритца и не отженет их с сицевыми,— горе и самой, по преж писаному. Ныне же оставим о сицевых, но преди пойдем.
А плате ходилное по грядкам, а прочее — в сундукех и в коробьях: и убрусы, и рубашки, и ширинки,— и все бы было хорошо и чисто и бело, уверчено и укладено, и не перемято, и не сполщено. А сажение и мониста и лутчее плате всегда бы было в сундукех и в коробиях за замком и за печатю, а ключи бы держала в малом ларце, а всегда бы ведала сама.

.