Всякому человеку, богату и убогу, велику и малу, разсудити себя и сметити по промыслу, и по добытку, и по своему имению. А приказному человеку жити, сметя себя по государьскому жалованию, и по доходу и по поместью, и по вотчине, и таков себе двор держати, и всякое стяжание, и запас. И по тому - и люди держати и обиход, по промыслу и по добыдку смотря, по тому и ести, и пити и носити и государю служити, и людей одевати, и с людми с добрыми сходитися. Аще кто, не разсудя себя и не сметя своего живота и промысла, и добытка, или государьского жалованья, и своего уроку праведнаго, и учнет на люди глядя, жити не по силе, заимуя или неправедным имением, и та честь будет с великим бесчестием и с укоризною, и с поношением, а в злое время никто ему не поможет: от своего безумия стражет, от Бога грех, а от людей посмех. Ино надобе всякому человеку тщеславия бегати, и похвалы, и неправеднаго собрания, жити по силе и по промыслу сметя, и по добытку своему правою силою. Ино житие благоприятно и угодно, и от людей похвално, и себе и детем своим прочно.