Аще кто не по Бозе живет и не по христианскому житию, и страху Божия не имеет, и отческаго предания не хранит, и о церкви Божий нерадит, и Божественаго Писания не требует, и отца духовнаго не слушает, и добрых людей по Бозе совету и наказания не внимает, чинит всяку неправду и насилие и обиду, силно отимет, взяв не отдаст, волокитою уморит, а молода человека во всем изобидит; и на суседстве кто не добр, или в селе на своих християн, или на приказе, или на власти дани тяжкие и всякие, оброки незаконные накладывает, или чюжую ниву попашет, или лес посекл, и землю переорет, и луг покосит, и ловлю рыбную ловит, и борти, и перевесье, и всякую ловлю, и всякое угодие, неправдою и насилием творит или ограбит, и покрадет, и розбиет на дорозе, и на стану грабит, и биет, и соромотит, и пустошит луги, пашню толочит, и всякую обиду чинит; или кого чем поклеплет, и чем подкинет, оклевещет, и ополишнит, и напрасно продасть, и в работу неповинных лукавством и насилием охолопит; или непрямо судит и непрямо обыскивает, или накриве послушествует и кающимся немилостив; или лошадь и всякую животину, и всякое стяжание; села и винограды, варници, мелници, лавки, анбары, дворы, и всякое угодие-силою отимет, или дешево в неволю купит, и ябедничеством вытяжет, или корчемным прикупом и всяким лукавным ухищрением, или росты, и паспы, и всяким неправедным събранием богатеет; и всякая неподобная дела творит: блуд, и нечистоту, и сквернословие, и срамословие, клятвопреступление, ярость, и гнев, и злопамятство, или з женою незаконно живет или от жены блудит, и содомски грех содевает, или корчмит, всегда ест и пьет без воздержания, во обьядение и пиянство, и праздников и поста не хранит, всегда в нечистоте пребывает; или чяродеиствует и волхвует, и отраву чинит; или ловы творит с собаками, и с птицами и с медведи, и всякое дияволе угодие творит, и скомрахи, и их дела, плясание, и сопели, песни бесовские любя, и зернию, и шахматы, и тавлеи,- сам государь и его дети, и его слуги, и его христиане тако ж творят, а государь о том не возбраняет и не обороняет, и обидящему управы не дает,- прямо все вкупе будут во аде, а зде прокляты. И во всех тех плодех не благословенных от Бога непомилован, а от народа проклят, а обидими к Богу вопиют, а своей души на погибель, и дому тщета. И все то проклятое и неблагословеное: ясти и пити и носити, все стяжание и плоди не Божий, но бесовстии,- ниисходят во ад живы душа их так творящих. И от них от всякого обилия и плодов от таковых Богу неприятна милостиня - ни при животе, ни по смерти. Аще ли хощете вечныя муки избыти, отдай не праведное обидимому и кайся вперед так не творити со всеми сими еже есть писано: скор Господь на милость Свою, истинно кающихся приемлет и великим грехом свободу дарует.