Аще кто по Бозе живет и по заповеди Господне, и по отеческому преданию, и по християнскому закону, аще ли властелин судит праведно и нелицемерно всем равно, богату и убогу, ближнему и далнему, знаему и не знаему,- тако ж доволни будут уроки своими праведными. И людем своим велит тако ж творити. Аще ли в селех и во граде, и на суседстве кто добр, и у своих християн, или на власти, или на приказе праведны уроки в подобно время емлет, не силою, ни граблением, ни мучением. А коли чего не родилося, и заплатити нечем, и он норовит. А у суседа, и у своего христианина, чего недостало на семена или на емена, и лошади и коровы нет, или государьския дани нечем заплатити,- ино его подмочи и ссудити, а у самого мало, ино в людех самому государю заняти, а своему христианину дати. И о них болезновати от всея душа, а от всякого обидящаго их беречь в правде. А самому государю и людем его в дому и в сслех, и на службе, и на жалованье, и во всяких посылках отнюд никого ни в чем не обидити: ни в пашне, ни в земле, и в домашнем ни в каком запасе, ни в животине, и всякого неправеднаго стяжания не желати.
    Благословенными плоды и праведным стяжанием жити подобает всякому человеку. И видя Бог ваша добрая дела и такову милость, и нелицемерную любовь ко всем и правду, и подаст Бог богатую милость Свою и гобину плодом, и всякого изообилия умножит. И милостыня та от праведных трудов и от благословенных плодов Богу приятна, и молитву их Бог услышит, и от грех свободит, и жизнь вечную подаст.
    А торговые люди и мастеровые, и земледеръци тако ж прямым и благословеным торгуют и рукоделничяют, и пашут - не украдчи, ни розбоем, ни граблением, ни поклепом, ни вылгав, ни выбожив, ни которым злохитрством, ни мздоимством, но прямою своею силою и благословеными приплоды и праведными труды торгуют, и рукоделничяют, или пашут хлеб, и всякое обилие, и всякие дела творят добрая по християнскому закону и по заповедей Господним: в сем веце угодит, и жизнь вечную наследить.