56.
В СЕННИЦАХ СЕНО, И В КОНЮШНЯХ ЛОШАДИ, И НА ДВОРЕ ЛЕСОВОЙ И ДРОВЯНОЙ ЗАПАС УСТРОИТИ, И ВСЯКАЯ ЖИВОТИНА

А в сенницах было бы сено устроено и не изрыто, и не розволочено по лесници и по крылцу, и по двору не ростаскано, всегды бы было обрано и подметено, и в ногах и в грязе не затоптано, и не накапало бы, и не навьяло, и не гнило, замкнуто. А солома потому ж была в кровле и прикладено и обрано, н очищено, и не розволочено б, и подметено, А в конюшне бы дозирати по вся дни: сена б класти в ясли, как лошадем съести, а в ноги б не рыли, а соломка под лошади стлати, А на воду б лошади водити бережно, робята б на них не гоняли, и вывяляти, и вычесати, и на дворе из желоба перед собою овсом кормити, и попонами вытерти, покрыти, а лете подкупывати и холодити. А коровам, и гусем, и уткам, и куром, и свиньям, и собакам корм давати и в хлевы солома слать и подгребати, и пойти — вода ставити. А животине и собакам на то свои суды держати, а чистых судов не поганить. А во всех службах ходити вечерем, и ночь, и утре, в фонарех бы была свечя с огнем, а в конюшне и у соломы однолишно из фонаря огня не вынимати, всякие для притчи. А бревна бы и дрова, и доски, и драници, и усечки, и урубки дощаные и бревенные и всякие устроити встороне, где пригоже, а не на дороге; а бревна и доски, и драници — на подкладках, а толке под кровлею, то лутче, чтоб в сухе и не завяло и не намокло. Дрова и щепы толке сухи, ино и топитца хорошо — и служке приступитца и взять и понести, ино хорошие, и не угрязнено, и сам не уваляетца.



Оглавление


Новый Домострой

на Главную страницу
на Главную
© Sergey I. Kravchenko 1993-2022
eXTReMe Tracker