А в клетех и в подклетех, и в анбарех устроити по государеву наказу ключнику всякая порядня: плате ветшаное и дорожное, и служне, и полсти, и япанчи, и кебеняки, и шляпы, и рукавици, и медведна, и ковры, и попоны и войлоки, и седла, и саадаки, и с луки и стрелами, и сабли, и топорки, и рогатины, и пищали, и узды, и оброти, и морхи, лысины и похви, и остроги, и плети, и кнутье, и вожжи моржовые ременные, и шлеи, и хомуты, и дуги, и оглобли, и миндери, и мехи дымчаты, и сумы, и мехи холщовые, и припоны, и шатры, и пологи, и лен, и поскони, и верви, и ужыща, и мыло, и зола, и ватшанои всякой запас, и обрески, и останки, и ветшаное и новое, и платяные, и кожаные, и железные обломки всякие, и гвоздие, и чепи, и замки, и топоры, и заступа, и всякой железной запас, и всякая рухлядь,- и все то розбирати, что пригоже в коробьях положити или в бочьках, иное и по грядкам, иное по спицам, иное в коробех, где что пригоже, туто то и устроити, в сухе и в покрыте от мышей и от мокра, и от снегу беречь и от всякие пакости. И все б было в писме, сколке чего нового и сколке ветшаново; а что попортилосе, то починивати, а всегды бы было готово, всякой запас как попытают.
    А выных подклетех, или подсеные, или в анбаре устроити сани, дровни, телеги, колеса, одры страдные, дуги,оглобли, хомуты, рогожи, посконные вожжи, лыка, мочала, веревки, лычные оброти, тяжи, шлеи, попоны, иной дворовой запас конской, где пригоже поставили, или положити, и повесити.
     А лутчие сани, воз, каптана, колымага укрути на подкладках, и все б было бережно и в суше за замком.
    А выном онбаре бочки и мерники, цепники, высытки, корыта, жолобы, извары, корци, фляги, сита, решета, и всякая порядня поваренная и погребная, а которые бочки и всякое судно попортилося или обручи огнили, или свалилися, и то велети окрепити, или дна поправити, или уторы переделати, и обручи новые наколотити. Все б то было готово, переделано наново - и выпарено, и вымыто, и высушено, чтоб ни гнилью ни блеснью, и затхлою не пахнуло; ни дрожжь бы ни хмелины не засушены, ни загнилися. Как которое судно понадобитца, ино б было готово, а дубник в запасе держати, что починити или изделати, а ветшаная бочка, и извара, и высыток, донце, дощечки боченные, и вечка, и всякое судно, все бы было припрятано - а все то ся прогожает на худую потребу, и ты доброго не портишь.