А у доброго человека и у доброй жены и у порядливой, и у смышленых и разумных людей у годового всякого запасу: и у рухляди, и у ествы, и у питя, и у хлебного, и у воложного, и у мясного, и у полтевого, у рыбново, и у ветчинного, и у солонины, и у вялого, и у ветреново, и у просолу, и сухари, мука, и толокно, и иной запас, мак, пшено, горох, масло, конопли, соль и дрова, солод, и хмель, и мед, и мыло, и зола и всякой запас, чему мочно вперед быти в брежении и незноено. У всякого бы году во всяком обиходе и в запасе сходилося вынои год, и чего выном году недородилося или дорого, ино тем запасом как даром проживет, а у нужного и у болного, и у недостаточного ссудит и подможет, кому как пригож. А коли чего изообилу запасено в дешевую пору, ино в дороговлю и продаст, ино сам ел и пил, и носил даром, а денги дома: доброго человека и добрые жены николи ни в чем меженина не имет. А старый запас держат на много лет, кои не портитца.