А у жены бы отнюд никако ж ни которыми делы пияное питие не было: ни вино, ни мед, ни пиво, ни гостинец. Питие бы было в погребе на леднике, пила бы безхмелную брагу и квас - дома и в людех. Аще придут отколе жены о здорове спросити, тем пития пьяного не давати ж, а свои жонки и девки не пойти ж до пьяна дома и в людех. А жене втаи мужа своего не ести, и не пити, и похоронок на еству и на питие потаи мужа своего не держати, а у подруг, и в племяни потаи мужа своего пития, и ествы, и зделки и поминков всяких не просити и самой не давати, и у себя чюжего не держати без мужня ведома; о всем советовати с мужем, а не с холопом, ни с рабою.
   Отнюд беречися от всякого зла, а слуг своих ложными словесы не обго-варивати мужу своему и насердки не держати. А что кто збродит, и то мужу сказати прямо, без прибавки. А мужу и жене отнюд оговору никакого ж не слушати и не веровати, без обыску без прямого, а жене к мужу безлепиц домашних не доносити. Чего сама не возможет управити, а которое дурное дело, то мужу сказати в правду, а в чем которая жонка и девка согрешит и не послушает, и слово и наказания не имеет, и какову пакость учинит,- и в том о всем с мужем переговорити и каково кому наказание учинити.
    А гостьи коли лучатца, и их потчивати питьем как пригоже, а самой пьяного пития не пити. А еству и питие и всякой обиход приносит один человек сверстнои, кому приказано, а ин мужеской пол тут рано и поздно отнюд никако ж ни коими делы не был бы, кроме кому приказано, что принести или о чем спроситися, и о чем приказати; и всего на нем пытати, и безчиния и невежства - а иному никому тут дела нет. А завтрокати мужу и жене отнюд не пригож, кроме немощи; ести и пити в подобно время.