39.
ПО ВСЯ ДНИ ЖЕНЕ С МУЖЕМ О ВСЕМ СПРАШИВАТИСЯ И СОВЕТОВАТИ О ВСЕМ:
И КАК В ЛЮДИ ХОДИТИ, И К СЕБЕ ПРИЗЫВАТИ,
И 3 ГОСТЬЯМИ ЧТО БЕСЕДОВАТИ

А по вся дни бы мужа жена спрашивалася и советовала о всяком обиходе, и воспоминала, что надобет. А в гости ходити и к себе звати, и ссылатца, с кем велит муж. А гостьи, коли лучятца, или самой где быти, за столом сести, и лучшее плате переменити, а отнюд беречися жене от пияного пития: муж пиян - дурно, а жена пьяна и в миру непригоже. А з гостьями беседовати о рукодели и о домашнем строении, как порядня весть и какое рукоделецо зделати; чего не знаешь, и того у добрых жен спрашиватися, вежливо и ласково, и, коя что укажет, на том ниско челом бити. Или у себя в подворьи у которые гостьи услышит добрую пословицу, и как добрые жены живут, и как порядню ведут, и дом свои строят, и как детей и слуг учят, и как мужей своих слушают, и с ними спрашиваютца, и им повинуютца во всем,- и то все себе внимати. А чего доброго не знаешь, ино спрашиватися вежливо, а дурных и пересмешных и блудных речей не слушати и не беседовати о том. Или в гостех увидит добрую порядню, или в естве, и в питии, и в каких приспех, или какое рукоделие необычно, и домашняя порядня где хороша, и которая добрая жена, смышленая и умная, и в речех и в беседе, и во всяком обиходе, или где слуги умны, и вежливы и рукоделии, и всякому добру смышлены,- и всего того добра примечати и внимати, или чего не знает и не умеет, и о том спрашиватися вежливо и ласково, и хто что добренко скажет и на добро поучит, или рукоделю какому понакажет, - и на том бити челом, и пришед на подворие, то все мужу пересказати на упокое. С такими то з добрыми пригоже ли сходитися, не ествы, ни пития для, но добрыя беседы и науку для, да внимати то в прок себе, а не пересмехати ни в коем, и не переговорити ни о ком. И спросят о чем про кого, и учнут ума пытати, ино отвечати: неведаю яз того, ничего не слыхала и незнаю; и сама ненадобном не спрашиваю, ни о княинях, ни о боярынях, ни о суседах не переосужаю.



Оглавление


Новый Домострой

на Главную страницу
на Главную
© Sergey I. Kravchenko 1993-2022
eXTReMe Tracker