А слуг своих заповедывай о людех не переговаривати, и где в людех были, и что видели недобро — того дома не сказывали бы. А что дома деетца, того бы в людех не сказывали: о чем послан, то и памятуй, а о ином о чем учнут спрашивати, того не отвечяи и не ведай и не знай. Отделавшися борзее, да то государю скажи, о чем послан, а их вестей никаких не сказывай, ино промеж государей ни­какие ссоры ни остуды не будет. И неподобные речи или блудные, и всякое дурное дело, и слово, слышев и видев,— то бы отнюд не именовалося. А к самому государю или к государыни чья служка придет, такаж ничего у нее не пытати, о чем прислан, в том его и отделати, да борзее отпусти. А чюжая служка почнет что сказывати, и того у нея не слушати, да еще и избранити: о чем ты прислан, то и памятуй, а иного у тебя не пытаем. То доброму мужу и жене похвала, толке у них слуги вежливы...
А куды пошлют слугу в добрые люди, у ворот легонко поколотити, а по двору идешь и кто спросит, каким делом идешь, ино того не сказывати, а отвечати; не к тебе яз послан, х кому послан, с тем и говорити. А то сказати, от кого идешь, и они государю скажут.
А у сеней или у избы, или у кельи, ноги грязные отерти, нос высморкати и выкашлятца, да искусно молитва сътворити, и толке аминя не от­дадут, ино в другие, и в третие молитва сотворити по болши перваго, и ответа не отдадут, и легонке поколотитися, и как впустят, и, вшед, святым покланятца, и от государя челобитье и посылка правити, а в ту пору носа не копати перстом, ни кашляти, ни сморкати, ни хракати, ни плевати, аще ли нужа, отшед на сторону устроитца вежливо. А стояти на сторону несмотрити, да что наказано, то исправити, а о ином ни о чем не беседовати, да борзее к себе пойти, да тот ответ государю сказати, о чем послан…
А умный и разсудный государь и государыни сами того не любят и не творят оговоров и посмехов и укоризн, лжи и клеветы. И всяких лукавых речей людех не переговаривают, и не ссужают и не слушают, и не пересмеют. А про них хто ссужает и укоряет, или посмехает, и злословит в очи и за очи,
или кто скажет, что на них таковыи речи неподобны, и премудрым своим разумом сия вся разсудити…
И слуг своих тако ж поучяи.