Предыдущая страница Следующая страница

Кривая Империя Сетевая Словесность Оглавление

33.
КАК ПОУЧЯТИ МУЖУ СВОЯ ЖЕНА БОГУ УГОДИТИ, А МУЖУ СВОЕМУ УНОРОВИТИ,
КАКО ДОМ СВОИ ДОБРЕ УСТРОИТИ, И ВСЯКАЯ ДОМАШНЯЯ ПОРЯДНЯ
И РУКОДЕЛЕ ВСЯКОЕ ЗНАТИ, И СЛУГ УЧИТИ И САМОЙ ДЕЛАТИ

П                
                
               

одобает убо мужем поучати жен своих с любовию и благоразсудным наказанием; жены мужей своих вопрошают о всяком благочинии, како душа спасти, и Богу и мужу угодити и дом свой добре строити,
и во всем мужу покарятися; что он накажет, то с лубовию и со страхом внимати и творити по его наказанию, и по сему писанию.
                Первое - имети страх Божий и чистота телесная, яко ж впредь указано бысть. Востав от ложа своего, и очистив себя, и молебная совершив, и слугам дело указати дневное и всякому рукоделью, и что работа дневная: ести варити, и которой хлеб печи, сетней, или решетной,- и сама бы знала, как мука сеяти, как квашня притворити, и замесити и хлебы валяти, и испечи квасны и бухоны, и выпеклися, и колачи и пироги тако ж; и колке муки возмут, и колке испекут, и колке родитца из четверти, и из осмины, или из решета, и сколке высевков, и колке испекут,- мера и счет знати во всем.
                А еству мясную и рыбную, и всякие пироги, или плины, и каши, и кисель, всякой приспех, и печи и варити - все бы сама государыня умела, ино и слуг научити умеет, и все сама знает.
А коли хлебы печи, тогда и платье мыти: ино с одного стряпня, а дровом неубыточно; и дозирати, как рубахи красные моют и лутчее платье, и колке мыла пойдет, и золы, и на колке рубашек, и хороше бы вымыто, и выпарено, и на чисто вымыто, и изсушено и искатано, и скатерти и убрусы, и ширинки, и утиралники, все тако ж; и всему тому самой счет знати, и отдати и взяти все сполна бело и чисто, а ветчаное поплатити вежливо, ино пригодитцо - нищем дати.
                А коли хлебы пекут, ино того ж теста велеть отняти и пирог зделати, или пшенишные пекут, и из межситки велити пирогов ж начинити, во скоромныя дни скоромною начинкою, какова лучилася, а в посныя дни с кашею или горохом, и с соком, или с репою, и з грибы, и с рыжики, и с капустою, или что Бог лучит,- ино семе потешение. А всякую бы еству мясную и рыбную, и всякой приспех скоромной и поеной сама бы знала, и умела зделати, а слуг научити: те государыни - добрые и домоводици.
                Тако ж бы знала ж пивной и медовой, и винной, и бражнои, и квасной, и уксусной, и кислым штям, и всякой обиход как делают, и поваренной и хлебной, и в чем что родитца, и колке ис чево будет.
                Коли все знает добрая жена, мужним наказанием и грозою, и своим добрым разумом и наукою, ино все будет споро, и всего полно. А которая женщина или девка рукоделна, и тем дело указати: рубашка делати или убрус брати и шити, или постав ткати, или золотное и шелковое пяличное дело - и которая чему учена, того всего досмотревати и дозирати. И всякой мастерици самой государыне прядено и шолк, и золото, и сребно отвесити, и тафты и камки отмерити и сметити, и наказати сколке чего надобе, и сколке чего даст, и прикроити и примерити - самой, и все свое рукоделье знати. А малых девок учити, которая чего пригожа, а мужним жонкам, которые черное дело делают, избу топят и хлебы пекут, и плате мъют,- тем дают лен на себя и на мужа и на дети прясти. А одинокая жонка и девка на государя лен прядут, а изгреби и пачеси - на себя, или как пригоже. А все бы ведала сама государыня, которой дело какое даст и колке чего даст, а изделаново колке чего возмет, и исколка чего выделано, и кто днем много ли мало ли зделает,- то бы сама все знала, а в счете бы было все.
                А сама бы государыня отнюд ни како ж ни которыми делы, опроч немощи или по мужни воли, без дела не была, ино и слугам на нее смотря повадно делати. Муж ли приидет, или гостья обышная приидет,- а она бы всегда седела над рукодельем сама: то ей честь и слава, и мужу похвала. А николи ж бы слуги государыни не будили, но государыня бы сама слуг будила, а ложилася бы спати всегда от рукоделья, молебная совершив, тако ж и слуг учила.

Предыдущая страницаСодержаниеСледующая страница


обратно в Новый ДомостройНовый Домострой


книга I
Кривая Империя
862-2000

книга II
Новый Домострой
1547

книга III
Тайный Советник
1560

книга IV
Книжное Дело
1561-1564

книга V
Яйцо Птицы Сирин
1536-1584

книга VI
Крестный Путь
986-2005
© Sergey I. Kravchenko 1993-2003: all works
eXTReMe Tracker