Предыдущая страница Следующая страница

Кривая Империя Сетевая Словесность Оглавление

26.
КАКОВЫ ЛЮДИ ДЕРЖАТИ,
И КАК О НИХ ПРОМЫШЛЯТИ ВО ВСЯКОМ УЧЕНИИ, И В БОЖЕСТВЕНЫХ ЗАПОВЕДЕХ,
И ДОМОВНОМ СТРОЕНИИ

А                
                
               

людей у себя держи дворовых добрых, чтобы были рукоделны, и кто чего достоин, и такому рукоделию учи. А не вор бы был, ни бражник, ни зерщик, не тать, ни разбойник, ни блудник, ни всякому злу не творец. Всякой бы человек у доброго государя первое научен страху Божию, потом всякой добродетели, вежству и смирению, и доброму промыслу, и домовному строению. Не крал бы, ни солгал, а ко всякой добродетели прилежен был, со смирением и с наказанием государя своего, по апостолу Павла заповеди еже пиша к Тимофею: елици суть под игом раби, своя господы всякой чти достойны да творят, да имя Божие и учение не хулится. Имущих верны господы, да не нерадят, яко братия суть; но паче да работают, яко вернии суть и возлюблени, иже заступающей и благодать восприемлюще. Сия, господине, сам ты учи и моли раб своих таким быти з запрещением и з грозою многою. И паки той ж апостол к Титу пиша, рабом: своим господем повиноватися, и о всем благоугодном быти, не прекоглаголъником, ни крадущем, но веру всяку являюще благу, да учение Спасителя нашего Бога украшают о всем.
                И сыт бы был твоим жалованием и одет или своим рукоделием. А чем ты его: платием ли или конским жалованием и всякою животиною пожалуеши, или пашенкою, или торговлею какою на его чясть, или сам что примыслит своими труды, тем бы доволен был и блюл бы вперед. А лучшее платно верьхнее и нижнее, и рубашка, и сапог блюл бы по праздником и при добрых людех, и в ведро, а всегда бы было у него чесно, не изгрязнено и не измочено, и от всякоя нечистоты соблюдено. А которой у тебя человек о том небрежен, и твоим жалованием в том нелепо ходит, и беречи не умеет, и ты бы своему приказщику велел у таких нечювственых людей платие с них сымати лучшее, и в своей казне беречи, и на время им давать, да опять, снемши, у себя беречи.
                А всем дворовым своим людем наказывай почясту, чтобы делали в вет-чаном платии, или и ново, на страду ему дано. А как в праздники или при добрых людех у тебя случатца, или тебе самому в людех быти, и было бы на людех твоих платие доброе, и берегли бы от грязи и от дождя, и от всякие нечистоты. И по времени, сняв с себя платеицо, высушити и вымяти, и укласти хорошенко, где живет,- ино тебе любо, и от людей тебе честьно, и слугам твоим прочно таковое брежение к платиу, и всегда в нове ходит. А люди бы были у тебя во чти и в грозе, и во всяком дозоре, промежу бы себя не кралися, а чюжого бы отнюд не похотели ни коими делы, а твоего бы брегли все заодин. А тебе бы не лгали и не клеветали ни на кого ни в чем, а ты бы им в том не потачил, и обыскивал прямо с очей на очи; злому не отпущаи, но с милостию казнь, да и прочий страх приимут на зло не дерзати; а доброго - жалуй, и всяк добру ревнует, и твоим жалованием хощет выслужити правдою и прямою своею службою, и твоим наказом и наукой добрым век свои изживет в добре, и бес твоие опалы, и душу спасет, и государю услужит, и Богу угодит.
                Да наипаче тебе самому государю наказывати людей своих, которым вмесно, ходити к церкви Божий всегда, или по праздникам, или во дворе пения слушати, и особ наедине молитися, и чистота телесная хранити, от всякого блуда, и пияньства, и лукавства, и от безвременного пития, и ествы, и объядения, и пьяньства воздержатися, и отцев бы духовных и з женами своими имели, и на покаяние приходили. А холостые отроки и девки в совершение возрасте жени, по апостолу: честен брак и ложе нескверно, а прелюбодеем судит Бог. А которые холостые блуд творят твоим небрежением или таи от тебя, и тебе того тако ж пытати со многим испытанием, отнюд бы не именовалося у тебя таково дело. Аще не радиши, а слуг держиши, а попечения о душах их не имееши, токмо еже им дело делати рано и позно на твою потребу, на пищу и одение, и на всяку твою службу,- и тебе самому о душах их отвечяти в день Владычня суда, по апостолу, еже пишет в послании своем: не брашна ради и пития, разоряй дела Божия. Се же есть дела Божия, еже презирати плотская, попещитеся о души, вещи бесмертнеи. По апостолу же: имуще пищу и одеяние, сими доволни будете.
                А женатые бы слуги своими женами законно жили, по духовного отца наказанию, от жен своих не блудили, а жены - от мужей. И по твоему наказанию, и отца духовнаго учению, тако ж и оне бы учили жен своих страху Божию, и вежству и смирению, и государыню слушали и повиновалися во всем, и своими труды, и рукоделием выслуживали, а не крали бы и не лгали, и не бражничяли, и не бляли, и баб бы не слушали, кои на зло потворяют младые жены - сиреч, иже сваживают с чюжими мужи и напаче их учят красти и блясти и всему злу.
                И многих слышах от баб потворены, иже бегают, пократчи государя и государыню, со многим имением, жонки и девки с чюжими мужики; и егда возмет у нее с чем збежала, и ее убиет или в воду посадит: себя погубит, а имение твое изгинет. Аще ли ти неверно мнитца о таковых бабах, то како в дом твои притти мужику незнаму. Или жонка и девка по воду пойдут или платия мыти и с мужиком начнут говорити, аще и знам будет им, они ж срамятца с ним и созретися: занеж с мужиком, а не с своим мужем говорити. А бабе всегда ей время с ними о какове деле говорити. Учинитца она торговкою, и пришед и пытает у них, надобе ли вам то или иное, или государыни вашей. И они у нее попытают, есть ли то,- она ж молвит: есть. И оне ей: дай, мы покажем государыни. Она ж отмолвица: дала есмь той и той жене доброй, тово и тово, и скажет человека доброго ж еще и по имени, а все лжет: и аз, кунки, иду, да у нее возму и к вам принесу. Они ж ей призапритят: принеси к нам до обеда ж или, как вечерню поют. Баба ж молвит: у кунки, знаю я, как к вам притти - то вы государя блюдетеся. И отыдет от них, и не идет к ним день или два, по дни ж, и по другом, к двору же к ним не идет и стрежет их, как пойдут на реку по воду или платя мыти. Баба ж пойдет рекши мимо, они ж ея вскличют, и молвят ей: о чем к нам не бывала, и не принесла, што хотела принести. Баба ж к ним удивитца велми, и молвит: вчера и третием дни была есми у тое и у тое жены добрые, и мужу имя скажет, а у них был пир, и она, кормилица, меня и не отпустила, и ночевала есмь у нея, с ея служками, а тамо есмь и не поспела ходити; меня жалуют многие жены добрые. Они ж ей молвят: принеси ж к нам,- и з запрещением великим.
                Да не плету много, сими делы бабы опознаваются з женками и з девками служащими. И начнет с ними та баба, с нею ж опознаются, не возбранно стояти, и говорити на реке и в еречю. Аще и государь осмотрит, они ж со женою, а не с мущиною стоят, и потом начнет к ним и к двору приходити, они ж опознают ея и с государынею своею. Горе мне, вси есмы прелщаеми от общаго врага - диявола, нашим оружием побежени бываем. Дръзну рещи: блаженная Феодора Александреиская не от жены ли прелщена: ложе мужа своего не сохрани, но покаянием и терпением многим велику сподобися от Бога сосуду избранну быти. А о ином еще да умолчим, понеж невмесно бывает слышащим. А имеяи уши слышати да слышит и разумевает в прикрытых слов. Но преди пойдем о тех же слуг.
                И з дурными речми к государыни не приходили, и волхвов с корением и з зелием, кто тем промышляет, с теми бы отнюд не зналися, и государем своим про тех не сказывали, те суть бесовские слуги. А служили бы государем своим верою и правдою, и добрыми делы, и труды, и государь и государыни людей своих жаловали бы и кормили, и поили, и одевали, и в тепле бы жили, и во всяком покое и в благоденьстве всегда. И государь и государыни, аще пребудут в сем наказании, как писано,- и оне душа своя спасут и дом свой устроят, и слуг своих тако ж в душевном и в телесном без всякоя скорби.
                Тако ж государю и государыни достоит попечение имети о нищих и странных, убогих, вдовиц и сирот, и достоит их покоити, паче ж в их недостачестве всяком, в душевном и в телесном, от своих праведных трудов; в душевном разумеваи, а в телесном расмотряи.
                И ако ж и к цервам Божиим, и к церковником, и в монастыри, и в темница приноси и посылай милостиня, елика твоя сила. Аще ли не имееши, и ты слово рци утешно, аще и сего недостанет ти, и ты не озлоби, ни опечялися своею нищетою, еже не имеши что дати нищему,- но помысли Господне слово: ему ж много дано, множая просят от него, сиреч преизлише еже множая; а ему же мала, малейшая просят от него, сиреч малейшая, еже чяшу малу воды, или слово утешно: еже есть малейшая - то последняя.
                Тако жив дом свои призывай, и та Богу приятна, и душе полезна; а отнюдь бы не вмещалося в дом твои ни от насилия, ни от грабления, ни от татбы, ни от всякого мздоимства, ни от ябедничества, ни от криваго суда, ни от корчемнаго прикупа. Аще от сего зла соблюдешися, то дом твои благословен будет от ныне и до века.
А государь и государыни и с чады своими, и с людми своими дворовыми, мужи и жены, старые и младые, по вся год в Великий пост ко отцем духовным на покаяние приходили, а достоинии и святых даров причяшалися;
аще и не единою годом, то боле мзду от Бога приимут.
                А отци бы духовные государя и их слуг на се поучяли, а государь бы о своей души и о слуг своих о сем велико попечение имел: а милостини дати слуге за свою душу ничего, ино за них государю дати, и о всем их потребных, опроче злаго дела. А во весь год: в неделю и в среду, и в пяток, и в праздники Господьские, и во все
святые посты чистоту телесную хранили, и во всяких добродетелех, и в воздержании от пьянства пребывали, и к церквам Божиим приходили, с приношением, за здравие и за упокой, и всякие святыня касалися подостоинству
и по совету отца духовнаго.
                А прочее писано о том же в главе 38 и 32.

Предыдущая страницаСодержаниеСледующая страница


обратно в Новый ДомостройНовый Домострой


книга I
Кривая Империя
862-2000

книга II
Новый Домострой
1547

книга III
Тайный Советник
1560

книга IV
Книжное Дело
1561-1564

книга V
Яйцо Птицы Сирин
1536-1584

книга VI
Крестный Путь
986-2005
© Sergey I. Kravchenko 1993-2003: all works
eXTReMe Tracker