Чада, послушайте заповеди Господни: любите отца своего и матерь свою и послушайте их, и повинуитеся им по Бозе во всем, и старость их чтите, и немощ их и скорбь всякую от всея душа понесете на своей выи, и благо вам будет, и долголетнии будете на земли. Сим очистите грехи своя, и от Бога помиловани будете, и прославитеся от человек, и дом ваш будет в веки, и наследите сыны сынов своих, и достигнете старости маститы, в всяком благоденьстве дни своя препровожающе. Аще ли кто злословит, или оскорбляет родителя своя или кленет, или лает, сий пред Богом грешен, а от народа проклят и от родителю. Аще кто бьет отца и матерь - от церкви и от всякия святыни да отлучится, и лютою смертию и градцкою казнью да умрет. Писано бо есть: отчя клятва изссушит, матерня и искоренит. Сын или дщерь непослушливы отцу и матери, в пагубу им будет, и не поживут дней своих, иже прогневают отца и досажают матери. Мнитца не согрешая к Богу, и есть поганого горее, и обещник есть нечестивым, о них же пророк Исайя рече; возмется нечестивый, да не видит славы Господня. Сих нечестивый именова, иже безсчествуют родителя своя. И паки рече: насмехающегося отцу и укоряющаго старость матерню,- да склюют и вранове, да снедают и орли.
    Честь же творяй отцу и матери и повинующеся им по Бозе во всем, возвеселитися имут о чядех своих, и в день печяли избавит их Господь Бог, и молитву их услышит, Его ж просят, подаст им вся благая. Покояй матерь свою, волю Божию творит, а угажаяй отцю, во благих поживет. Вы ж, чяда, делом и словом угажайте родителем своим во всяком блазе совете, да благословени будете от них: отче благословение дом утвердит, а матерьня молитва от напастей избавит. Аще ли оскудеют разумом в старости отец н мати, не безсчествуйте их, ни укаряйте, да от своих чяд почтени будете. Не забывайте труда матерня и отцова, яже о вас болезноваша и печялни бышя, покоите старость их и о них болезнуйте, яко ж они о вас. Не глаголи: много им сътворих добра одеянием и пищею и всякими потребами,- но ни си свобод сим, не можеши бо ею родити и тако ею болети, яко она о тебе. Тем же со страхом раболепно служите им, да и сами мзду от Бога приимете и жизнь вечную наследите, яко совершители заповеди Его.