19.
КАКО ДЕТЕЙ СВОИХ ВОСПИТАТИ ВО ВСЯКОМ НАКАЗАНИИ И СТРАСЕ БОЖИИ

А пошлет Бог у кого дети, сынове и дщери, и имети попечение отцу и матери о чядех своих; снабдети и воспитати в добре наказании: и учити их страху Божию, и вежеству, и всякому благочинию. И по времени, по детем смотря и по возрасту, учити их рукоделию, отцу - сынов, а матери - дщери, кто чему достоин, каков кому просуг даст Бог. А любити их и беречи и страхом спасати, учя и наказуя, и разсужая, и раны возлагати. Наказуй дети во юности - покоят тя в старость твою. И хранити и блюсти о чистоте телесной, и от всякого греха, яко ж зеницу ока, яко ж своея душа. Аще что дети съгрешат отцовым и матерним небрежением, и о тех гресех ответ дати самем в день страшнаго суда. Аще дети небрегомы будут, и вне наказании отца и матери, аще съгрешат что зло сътворят, и отцу и матери и з детми от Бога грех, а от людей и посмех, а имению тщета, а себе скорбь, а от судей продажа и срамота.
    А у богобоязнивых родителей и у разумных и разсудных чада воспитани в страсе Божий и в добре наказании, и во благоразсудном учении всякому разуму, и вежству, и промыслу, и рукоделию,- и те чяда с родители своими бывают от Бога помилованы, а от священнаго чина благословени, и от добрых людей хвалими, и егда будут в совершене возрасте - и добрые люди с радостию и с благодарением сынове у них женять, и дщери дают, прибирая по своей версте и по суду Божию. Аще от таковых которое чядо Бог возмет, в покаянии и с причястием, то от родителю бескверная жертва Богу приносится, и в вечныя кровы вселяются, и имеют дерзновение у Господа милости просити и оставления грехов о родителях своих.



Оглавление


Новый Домострой

на Главную страницу
на Главную
© Sergey I. Kravchenko 1993-2022
eXTReMe Tracker