17.
КЛЮЧНИКУ ПРИКАЗ, КАКОВ ПРИЛУЧИТЦА

И коли пир болшеи, ино всюды самому дозирати, и в поварне и в доспешне, и в хлебне. А на стол ества отдавати приставити добра человека, а у поставца у питья и у судов добр же человек надобе, штобы было брежно. А в стол питие подавати по государеву наказу, кому что велено, а на сторону никому не давати без веления. А в столе и после стола смотрети и памятовати и беречи сосудов сребряных и оловяных и медяных, оловяников и мушором, и ковшов и братин и блюд, куды что в чем пошлют, и хто понесет, и на том того и пытати; ж на сторону бы чего не украли, всего того беречи на крепко. А на дворе потому ж человек бы поставлен добр и всего бы смотрил и берег: и домашние порядни всякие, и не украли бы чего, и гостя пьяного зберег, чтобы не истерялся и не избился, и брань бы не была ни с кем. А которые люди на дворе у гостиных лошадей и у саней и у седел, того всего беречь, чтобы промеж себя не искралися, и не бранилися, и гостя бы не исхаяли, и домашного бы чего не украли и не испортили,- всего того смотрети и унимати; а хто не слушает, ино государю сказати. А тому человеку, которой на дворе поставлен, в те поры отнюд не пити, никуды не отходити, туто на дворе, и в подклетех, в хлебне, и в поварне, и на конюшне беречи накрепко.
    А как стол отидет и пир минет, ино суды сребряные и оловяные собрати и сметити, и снести, и перемыти, и устроити, где то живет; и повареныи и хлебный запас тако ж. А ества перебрати, мясная и рыбная, студень и ухи, и устроити по преж писанному. А коего дни пир был, того вечера или порану самому государю все пересмотрити, и сметити, все ли поздорову, и перепытати у ключника подлинно, коль чего съедено, и испито, и кому што отдано, и послано, и всякой росход во всяком обиходе было бы введоме, и суды бы всякие в счете, и умел бы государю сказати про все прямо, куды что розошлося, и кому что дано и колко чего сошлося. И толке дал Бог все поздорову, не истеряно и не испорчено ништо, ино государю пригож ключника почтити, и иных служек потому ж: и поваров, и хлебников, которые вежливо и бережливо стряпали, а не пили, ино всех прохладити и накормити, и напоити, и оне тщатца и вперед быти добры.



Оглавление


Новый Домострой

на Главную страницу
на Главную
© Sergey I. Kravchenko 1993-2022
eXTReMe Tracker