Предыдущая страница Следующая страница

Кривая Империя Сетевая Словесность Оглавление

15
КАКО КОРМИТИ ПРИХОДЯЩИХ В ДОМУ СВОЕМ, 3 БЛАГОДАРЕНИЕМ, 3 ДОМОЧЯДЦИ


Е                
                
               

гда трапезу предпоставляеши, в начале священници Отца и Сына и Святаго Духа прославляют, потом Деву Богородицю и Пречистой Хлеб выимают, и по отшествии трапезы Пречистый Хлеб въздвизають и, отпев, достоини вкушають, и чяшу Пречистые пьют. И потом о здравии и за упокой да глаголють. И егда ядяху з благодарением, и с молчянием, или с духовною беседою, тогда Аггели невидимо предстоят, и написуют дела добрая, и ества и питие в сладость бывает. И аще начнут представленую еству и питие похуляти, тогда мотыла обращаются сии вкушати.
             И аще начнут смрадные и скаредные речи, и блудные, срамословие, и смехотворение, и всякое глумление, или гусли, и всякое гудение, и плясание, и плескание и спотъкатание, и всякие игры, и песни бесовские,- тогда яко ж дым отгонит пчелы, тако ж отъидут Аггели Божии от тоя трапезы и смрадныя беседы. И возрадуются беси и приидут и волю свою улучив, и вся угодная творится им: да тако ж и еще начнут безчиньствовати, зернью и шахматы, и всякими играми бесовскими тешитися, и дар Божий, еству и питие, и всякие овощи, в поругание помещут, и проливают и друг друга шибают, и обливаются, всячески поругаются дару Божию, а беси написуют дела их, приносят к сотоне, и вкупе радуются погибели християньския. И та вси дела предстанут в день страшнаго суда: о, горе - деющим таковая. И егда жидове в пустыни седоша ясти и пити, и объядшися и упившися и всташа играти и блуд творити, и тогда пожре земля их 20 тысяч и 3 тысячи; о устрашитеся сего людие и творите волю Божию, яко ж есть в Законе писано; а от сего зла безчиния соблюди, Господи, всякого христианина. Ести вы и пити н славу Божию, а не объядатися ни упиватися, и пустошных не творити.
             И аще пред кого поставлявши еству или питие, и всякое брашно, или пред тебя поставляют, не подобает похуляти и глаголати: се гнило, или кисло, или пресно, солоно и горко, затхлося, сыро, переварено, или какую хулу ни буди возлагати, но подобает дар Божий - всякое брашно и питие - похваляти и с благодарением вкушати, ино Бог обоняет вонею благоухания и в сладость претворит. И аще которая ества и питие непотребно, ино о том иаказывати домочядцев, хто делал, чтобы вперед таково не было.
             От Евангелия. Егда зван будеши ким на брак, не сяди на преднем месте, еда кто честней тебе будет званный им и, пришед, иже тебе звавыи и оного, речет ти: ты даждь сему место,- и тогда начнеши с студом последнее место держати. Но, егда зван будеши, шед, сяди на последнем месте, да егда придет звавыи тя речет ти: друже, посяди выше,- тогда будет ти слава пред званными с тобою, яко всяк возносяися смирится, а смиряяися вознесется.
             И еще к сему приложи: егда зван будеши на брак, не мози упитися до многа пьяньства, ни до позда седити, занеж во мнозе пьяньстве и в долзе седении бывает брань и свара, и бои, притчею и кровопролитие. И ты, быв туто ж, аще и не бранишися, ни дерешися, будешь в той брани и в драки непоследнеи, но преднеи: занеже долго седишь и брани дожидаешися. И государю в том на тебя помолва ж: спати к себе не идешь, а домочядцем покоя в том нет, и розправки с ыными званными. Аще ли упиешися до пияна, а к себе спати не соидеши или несъедеши, тут и уснеши, где пив, и будеши небрегом никим же, зане ж люди мнози, а не ты един. И в том во своем пьяньстве и небрежении, платие на себе изгрязниши, и колпак и шапку истеряеши. Аще ли будет денег в мошне или в калите, то вымут, а ножи соимут - ино в том государю, у кого пив,- в тебе кручина, а тебе наипаче: се истерялсе, а от людей срамота, и молвят: где пив, ту и уснул, кому его беречь самому пьяну. Видиши ли, каков срам и укор и тщета имению во мнозе пиянстве.
             Аще ли соидеши или съедеши, а пъянъстве во мнозе, и ты на пути уснешь, а до дому не доидеши, и постражеши и горши прежнего: соимут с тебя и все платие и што имаши с собою, и не оставят ни срачици. Аще ли не истрезвишися и конечным упиешися, реку: с телом душу отщетиши. Мнози пияни от вина умирают и на пути изябают. Не реку: не пити, не буди то; но реку: не упиватися в пиянство злое. Аз дара Божия не похуляю, но похуляю тех, иже пьющих без воздержания. Апостолу Павлу к Тимофею пишущу: пии мало вина стомаха ради и чястых недуг,- к нам же пиша: пиитие мало вина, веселия ради, а не пьянства ради: пияници Царствия Божия не наследять. Мнози и земнаго имения пияньством лишаются человеци. Аще начнет держатися пития незаконного, хвалим будет неразумными, последи же от тех же поруган будет, яко во зло истощи имение свое. Апостолу рекшу: не упиваитеся вином, в нем же несть спасения, но упиваитеся в славословии Божий,- реку: молитвою и постом, и милостинею, и к церькви хожением с чистою совестию. Те хвалими суть Богом, и от Него мъзду приимут в Царствии Его. А винное упивание - погибель души и телу, а имению своему тщета. Пияници со земным сим имением лишаются и Небеснаго, зане ж не Бога ради, но пьянства ради. Но токмо единем бесом радование, и с ними в жребии, аще не покаются. Видиши ли, о человече, каков срам и укор от Бога и от святых Его. И причитает апостол пияницу и всяк грех творяща, яже суть неугодна Богу, в жребии с бесы, аще истинным покаянием не очистятся. Буди ж всем християном, иже по Бозе в православной вере живущим, в жребии с Господем нашим Иисусом Христом и со святыми Его, славящим Святую Троицю - Отца и Сына и Святаго Духа, аминь.
             Но на предлежащее пойдем, о нем же нам слово. А подати кому ести или пити государю дому, или от предстоящих его, или в стол, или послати худы, разсужая подостоинству, и по чину и по совету. Вся сия от болшаго бывает, а от прочих сие не бывает; аще за любовь или за некое послужение, искусно да зделаются, и о сем прощаются от настоящего. А от стола или от трапезы ества или питие тайно износити или высылати, не по повелению настоящаго, и без благословения,- святотатьство и самочиние, таковых всячески бесчествуют.
             Егда на трапезе поставят ти много различнаа яди и пития, еда кто честнее тебе будет званных, не начни преж вкушати ничто ж; аще ли ты начялствен будеши, поставленую ядь разсужая начинай. У неких боголюбцев изообило бывает, вкушения различна, ествы и пития, излишнее цело снимают, впредь инем на потребу, или в подачю, или в розсылку. И аще кто нечювствен, и неискусен и неучен, и невежа, и не разсужая всякую еству в пресыщение начинает и небрегомо творит, будет и сам поруган и обезсчестен от Бога и от человек.
             А коли лучитца накормити приеждих людей или торговых, или иноземцев и всяких гостей званых, или Богом избранных, богата и убога, и священнически чин и мнишески, ино государю и государыни разсудным достоит быти и долъжную честь воздаяти по чину и по достоиньству всякому человеку. С любою и з благодарением, и с ласковым приветом всякого ночтити, - всякого примолвити, и добрым словом привечяти, и ести и пити поставити, или подати из своих рук з добрым приветом, а иным послати, и всякого примолвити, и всякого обрадовати. А которые в сенех, или на дворе седять, тех всех накормити и напоити, и в столе памятовати, ести и пити всем тем высылати. Или у кого сын или верной слуга, и он бы везде дозревал, и всякого бы почтил, и добрым словом привечял, а никого бы не избранил, ни обезчестил, ни осоромотил, ни осмиял, ни осудил, а ни государю ни государыни ни детем ни слугам их. А гости или гостьи промеж себя побранятця - ино унимати добродетелию, а хто неустроен - ино брежно его спровадити ко двору своему, а отнюд от брани бречи всякого; с любовию и з благодарением, накормив и напоив, чесне отпустити - ино Богу в дар, а добрым людем - в честь. А нищим тако ж, и в милость и во благодарение, а себе от Бога мъзда, а от людей добрая слава.
             А в монастырех кормля или по родителех память: тако ж творити, кормити и поити и милостыня давати елика сила, за здравие и за упокой. Аще кто накормит и напоит, и одарит, после обесчестит, излает, или осудит и пересмеет, или за очи переговорит, или местом обесчестит, или не накормив да излаяв, и ударив, да сошлет з двора, или слуги кого обесчестят,- и тот стол или пир бесом на утеху, а Богу на гнев, а людем на позор и на гнев, и на вражду, а обесчестным - на срам и на оскорбление. А безумному тому государю или государыни и их слугам от Бога грех, а от людей укоризна и вражда, а от убогих клятва и неблагословение. Аще кого не накормити, ино тихонко отмолвити, не излаяв и не ударя, и не обесчестити, отпустити вежливо, и отказати. А пойдет кто з двора ропщучи, государевым недозором или государниным, ино вежливой слуга вежливо гостю розговорит: не подиви, господине, на многих людех государем нашим, не поспели тебя употщивати, и они тебе вперед челом биют, а ты на них ныне не помолви. И после пиру тому слуге своему государю сказати про тово гостя, как сшел, а будет надобной гость, ино и в те поры государю сказати, и оне как похотят.
             А у государыни жены добрые и всякие гостьи, каковы лучятся у нее, и ей сим же образом творити, как в сей главе писано. И детем ей и слугам тако ж.

Предыдущая страницаСодержаниеСледующая страница


обратно в Новый ДомостройНовый Домострой


книга I
Кривая Империя
862-2000

книга II
Новый Домострой
1547

книга III
Тайный Советник
1560

книга IV
Книжное Дело
1561-1564

книга V
Яйцо Птицы Сирин
1536-1584

книга VI
Крестный Путь
986-2005
© Sergey I. Kravchenko 1993-2003: all works
eXTReMe Tracker