8.
КАКО ВРАЧЕВАТИСЯ ХРИСТИЯНОМ ОТ БОЛЕЗНЕЙ И ОТ ВСЯКИХ СКОРБЕЙ - И ЦАРЕМ, И КНЯЗЕМ И ВСЯКИМ ЧИНОВНИКОМ, И СВЯТИТЕЛЬСКОМУ ЧИНУ И СВЯЩЕННИЧЕСКОМУ, И МНИШЕСКОМУ, И ВСЕМ ХРИСТИЯНОМ

Аще Бог пошлет на кого болезнь, или какую скорбь, ино врачеватися Божиею милостию, да слезами и молитвою, постом и милостынею к нищим, да истинным покаянием, да благодарение и прощение и милосердие и нелицемерная любовь ко всякому. Аще кого чем преобидел, отдати сугубо, и вперед не обидити. Да отцев духовных и всяк чин священнически и мнишески подвизати на моление к Богу, и молебны пети, и вода святити честным Животворящим Крестом, и со святых мощей и с чюдотворных образов, и маслом свящатися, да и по чюдотворным по святым местом обещеватися, и приходяще молитися со всякою чистою совестию, тем целба всяким различным недугом от Бога получити. Да и от всяких грехов удалятися, впредь никакова зла не творити. И отцов духовных заповеди хранити, и епитемьи исправляти, тем очиститися от греха, и душевная и телесная болезнь исцелити, и Бога милостива сотворити. Всякому христианину целити себя от всяких различных недуг, душевных и телесных, и душетленных и болезненых страстей, жити по заповеди Господни, и по отческому преданию, и по християньскому закону, яко ж в начяле писано книги сия от первый главы, вся 15 глав, и прочая главы книги сея, тако ж прочести и 29 глава: внимати и творити достоит, - ино и Богу угодит и душу спасет, и греха избудет, и здравие получит душевное и телесное, и вечных благ наследник будет.
    А кто бестрашен и безчинен, страху Божию не имеет, и воли Божий не творит и закону християньского отческаго предания не хранит, о церкви Божий и о церковном пении, и о келейном правиле, и о молитве, и о всяком славословии Божий нерадит, ест и пиет без воздержания, и во объядение и в пияньство и не в подобно время, и законнаго жителства, не хранит недели, и сред, и пятка, и праздников, и Великого поста, и Богородична, без воздержания блудит, и не в подобно время, и чрез естество и чрез закон, или от жен блудят, или содомски грех содевают, и всякое скаредие творя, и всякие богомерские дела: блуд, нечистоту, сквернословие, и срамословие, песни бесовские, плясание, скакание, гудение, бубны, трубы, сопели, и медведи, и птици, и собаки ловчи творяще, и коньское уристание, - всяко бесовское угодие и всяко безчиние и безстрашие, к сему ж чярование, и волхование, и наузы, звездочетие, рафли, алманахи, чернокнижие, воронограи, шестокрил, стрелки громны, топорки, усовники, днакамение, кости волшебные, и иные всякие козни бесовские. Или кто чяродеиством, и зелием, и корением, и травами на смерть, или на потворство окормляет, или бесовскими словами, и мечтами, и кудесом чярует на всякое зло и на прелюбодеиство, или кленетца именем Божиим во лжу, или клевещет на друга,- туто ж прочти и 28 главу. В тех во всех делех, и во обычяех и нравех востает в человецех гордость, ненависть, злопомиение, гнев, вражда, обида, лжа, татба, клятва, срамословие, сквернословие, и чярование, и волхование, смех, кощуны, обьядение, н пиянстно - безвременное рано поздо,- и всякая зла дела, и всякий блуд, и всякая нечистота. И Благии человеколюбець Бог, не терпя в человецех таких злых нрав и обычаев, и всяких неподобных дел, яко ж чадолюбивый отец, скорбьми спасает и к спасению приводит, показу я наказает за премногия грехи наша, смерти же скорыя не предает, не хощет смерти грешничи, но ожидает покаяния: еже обратитися и живу быти ему. Аще не обратяться и не покаються от злых дел, наводит на ны, грех ради наших, овогда глад, овогда мор, ово пожары, ово потоп, ово пленение и посечение от поганых, и градом разорение и церквам Божиим, и во всякой святыни потребление, и всякому стяжанию расхищение, и от другов оклеветание. Овогда от царьскаго гнева разграбление имению, и самому казнь без милости, и плачная смерть, и от разбойник убийство, и грабеж, и от татей окрадение, и от судей продажа и мучение. Ово бездожие, ово безвремение дожду, и нестройные лета, и зима неугодна, и лютые мразы, и земли бесплодие, и всякому животному скоту падеж, и зверем, и птицам, и рыбам, и всякому обилию скудость; родителем, жене и чадом нужными и напрасными и скорыми смертьми лишение, от многоразличных и нужных и тяжьских недуг страдание, и зле скончяние. Мнози убо праведници и истинно Богу работают, по заповедей Господним живут межу нами грешными, но на сем свете равно с грешники казними суть от Бога, да светлейших венцов от Господа сподобятся, нам же Грешником болшее мучение, яко праведници казними быша всякими скорбьми за наше безаконие; и о всех сих настоящих бедах не уцеломудримся, и не накажемся, и в покаяние, и в чувство, и в страх Божий не внидем. Видя таково праведнаго гнева Божия наказание, за премногия грехи наша, и паки Господь наказуя ны, и обращая к покаянию, якож праведнаго и долготерпеливаго Иова искушая, посылаа различныя скорби и болезни, и тяжкие недуги, от духов лукавых мучение, телу согнитие, костем ломота, оток и опухоль на все уды, проходом обоим заклад, и камень во удах, и кила, и тайным удом огнитие, и оток, и глухота, и слепота, и немота, во утробе терзание, и блевание злое, и на низ во оба прохода, и кров, и гнои, и сухотная, и кашель, и главоболие, и зубная болезнь, и грыжа, и усови и камчюг, и френчюги, и разслабление, и трясение, и желви, и железы, и шолуди, и горб, и глава, и щоки, и ноги, и руки закорчены, и очи искривлены, и всякие тяжкие различные недуги - наказание гнева Божия. И сия вся своя грехи презрехом, и в покаяние не внидохом, ничтож не уцеломудри, не устраши нас, и не накажемся о чем, видя Божие наказание на себе, и болезни тяжкие за премногия грехи наша, оставя Бога създавшаго ны, и милости прощения грехов от Него не требуя, еже зле содеяхом, и приступихом к нечистым бесом, от них же отрекохомся в святом крещении, и всех дел его, и призываем к себе чародеев, и кудесников, и волхвов, и всяких мечетников, и зелеиников, и с корением, от них же чяем душетленныя временыя помощи, и уготоваем себя диаволу, во дно адово в веки мучитися. О безумнии человеци, оле неразумия вашего, не разсужасм своих грехов, за что ны Бог наказует и казнит, и не каемся о нех, и не престаем от злоб, и от всяких неподобных дел, не помышляем вечнаго, но желаем тленнаго и временнаго. Молю и паки молю: престанете от злоб, от всяких душетленных дел и очистим себе истинным покаанием, яко да милостив Господь помилует от грех, и подаст телесе здравие, и душам спасение, и вечных благ не лишит. Аще кто потрудиться в сем веце со благодарением в различных болезнех и во всяких скорбех за очищение грехов своих, Царства ради Небеснаго, не токмо грехом свободу получит, но и вечных благ наследник будет. Написано бо есть во святом Апостоле: многими скорьбми подобает нам внити в Царство Небесное. В святом Евангелии речено бысть: ускии и прискръбныи путь вводяи в живот, а широкий и пространный вводяи в пагубу. И паки рече Господь: нужно есть Царство Небесное, и нужници восхищают его. Воспомянем святых муж страдания Бога ради, и многоразличных недуг, и болезнен, и терпения с благодарением, не призывающе к себе ни чяродеев, ни кудесников, ни волхвов, ни зелеиников, ни каких бесовских врачевании, но все упование възлагающе на Бога, со благодарением терпяще, очищения ради грехов своих и вечных благ наслажения,- яко долготерпеливый праведный Иов и нищий Лазарь, иже пред враты богатаго на гноищи лежа гноен и червьми ядом, ныне на лони Авраамли почивая; и яко ж Семион Столпник сам гноя тело свое, червьми кипя, и мнози праведнии от века Богу угодивше, всякими болезньми и различными недуги стражуще, с благодарением терпяще, спасения ради душа своея и жизни ради вечныя, и теми скорбми внидоша во Царство Небесное, мнози - и богати и убози християнского рода, во всяких чннех- княжска и болярска, и священнического, и мнишескаго, многоразличными болезньми и недуги стражуще, и всякими одержими бываху скорьбми, и обиды Бога ради терпяще, и у Бога милости просяще и помощи чяюще.
     И Милосердый Господь многоразличныя милости на рабы Своя излияет и исцеления дарует и от грех свобожает, и от скорбен спасает: овех от Животворящих Крестов и от чюдотворных икон, святых образов Христовых и Богородичиных, и Архаггельских и всех святых, и от святых мощей, освящения воды, и от масленаго освящения, и от молебнаго соборнаго пения, и на божественых литургиях, и на всенощном предстоянии во святых Божиих церквах, и в честных монастырех, и в чюдотворных местех, и в дому, и в пути, и на водах,- и везде призывающе верою Господа Бога, и Пречистую Богородицю, и их угодников, милость получяють, здравие телес и душам спасение.
     Мнози и кончяшяся в тех недузех, и в тяжких болезнех, и в различных скорбех, теми очестишася от грехов, жизнь вечную получиша. Вонмем себе опасно, и подражаим тех житию и терпению, и поревнуем святых отец житию, пророком и апостолом, святителем и мучеником, преподобным и уродивым Христа ради, и святым женам, и православным царем и князем, н священническому и мнишескому чину, и всем християном богоугодно жившим от века.
     Како в житии сем скорбми пострадаша Христа ради - ови постом и молитвами и всяким длъготерпением, гладом и жажею, наготою и мразом, солнечным жжением, поруганием и оплеванием, и всякими укоризнами, н бьением и мучением, различными муками от нечестивых царей Христа роди; и усекаеми и огнем сожигаеми и зверми снедаеми, и камением побиваеми, и в водах истопляеми, и в вертепех и в пустынях и в пропастех земных скончяшяся, во узах и в темницах заключяеми и пленении, всякие терпешя скорби и труды, и различныя муки их кто исповесть, якож повествует Святое Писание.
     И сих ради различных страдании и всяких мук каково възмездие прияша от Христа в сем веце и в будущем: вечных благ наслажение, иже око не виде, и ухо не слыша, и на сердце человеку не взыде, яже уготова Бог людем Его. Како прославляются ныне, якож церковь Божия вопиет. Мы ж тех святых молим и на помощь призываем к Богу молитися о нас, и от тех чюдотворных образов, и честных мощей целбу получяем.
     Поревнуем тех святых житию и страданию з благодарением и долготерпением, такову ж Благодать от Бога обрящем.

                                                                                             О волшбах и о обавницех    
     6-го собора правило 61. И давшимся волшбам, или глаголющем мудрецем, сотником или ким таковым, аки от тех навыкнут и, аще открыти хотят по первому от святых отец от них же заповеданаго да повинуются правилу канону 6 лет такем же запрещением покорити подобает и влачащая медведи, или какова животная некак на ругание простейшим людем и получение, рожество и родословствие по звездословию, и таковых неких глагол народи - прелестное блядство приглашающая. Глаголемыя ж облакопрогонники, и чяровники, и хранителники, и волшебники пребывающая ж в тех и не отбегающе пагубных тех еллиньских начинаний, вся везде отметати от церкви заповедаем, яко ж священници, но ни повелевают: кое общение свету со тмою, яко ж рече апостол; или кое сложение церкви Божий с кумиры; или кая чясть верному с неверным; и кое совещание Христови со дияволом.
     Толк. Иже последують пагубным обаянием и к волхвом, или к обавником ходять, или в дом свои тех призывают, хотяще увидети от них некаа неизреченная, тако ж и кормяще и храняще медведи, или некая псы, и птици ловчи, на ловление и на глумление и на прельщение простейших человек, или в подучяи верують, и в родословие, рекше, в рожаници и во обаяние по звездословию, иже глаголють облаки гонящей,- таковая творящем повеле собор 6 лет запрещение даяти, якож за 4 лета да стоят с припадающий, друзи 2 лета да стоят с верными, и тако сподобятся Божественых Даров. Аще ж не исправлени будут и по запрещении и еллиньских сих хитростей не останутся, от церкви - везде и всячески - да отженутся. И о волхвех и о обавницех рекоша богоноснии отци и церковнии учители, паче ж инех Иоан Златоуст глаголет: яко волшествующеи и обавление творяще, аще и Святыя Троица имя нарицают, аще и знамения Честнаго Креста Христова творять,- бегати от них подобает и отвращатися.
     Иже во Анкире правило 24. Волшествующе, и обычаю язычных последствующе, вводяще некия в домы своя на испытания потвор, или на потребление, и каноном запрещение приимут 5 лет, по заповеданным степенем: рядом 3 лета внутрь пребывания, вне церкве 2 лет, молитвы бес просфири и без компания.
     Толк. Аще кто волхвом или обавником, или зелеиником, или другим таковым себе вдаст, и сия призывает в дом свои, да открыет ему, и поведят ему о них же желание имат, или очярованну ему бывшу, обрести, хотя таковое смыти, яко злом злее исцеляя,- 3 лета да припадает, и за 2 лет да стоит с верными, токмо молитв с ними приобщаяся, и так по скончянии 5 лет причястится Святых Тайн.
     Правило 61 6-го собора, иже в Труле полатнем. 6 лет таковым не повелевает общения приимати, рекше, не причящатися.
     6-го собора в Константине граде, в Труле полатнем правило 11. Ни единого несть християном приобщения к жидом. Сего ради убо аще кто обрящется тех опресноки ядя, ли врачя их призывая на целбу себе или мъяся с ними в бани, или инако како присвояся с ними, аще есть причетник, да извержется, или мирянин, да отлучится.
     Василия Великаго правило 72. Волшебником себя вдав, или ким таковым летом убиици,- и то запретится.
     Толк. Вдавыи убо себя волхвом, или обавником, или чяродеем, на учение злохитрьства их, яко волею убивыи, запрещение да приимет; веруя ж в волхвы, или вводя их в дом свои, обретения же ради некоего очищения от отравлении, или откровении ради неких неизреченных,- 6 лет запрещение да приимет, яко ж 61 правило повелевает 6-го Вселенскаго Собора, иже в Констянтине граде, в Труле полатнем, и 83 се правило в сем послании Великаго Василия.



Оглавление


Новый Домострой

на Главную страницу
на Главную
© Sergey I. Kravchenko 1993-2022
eXTReMe Tracker