7.
КАКО СВЯТИТЕЛЬСКИЙ ЧИН ПОЧИТАТИ, ТАКО Ж И СВЯЩЕННИЧЕСКИЙ, И МНИШЕСКИЙ, И ПОЛЗОВАТИСЯ ОТ НИХ О ВСЯКИХ СКОРБЕХ ДУШЕВНЫХ И ТЕЛЕСНЫХ ИЗВЕЩАТИСЯ

К святительскому чину всегда прибегай и должную честь воздавай им, и благословления и духовнаго поучения требуй от них, и припадай ногама их, и во всем повинуйся им по Бозе. Тако же священническому чину и мнишескому велию веру, и любовь, и повиновение, и всякое покорение пред ними имей, и духовную ползу от них внимай. А о недоразумных и о душевных советех, и о всяких греховных винах без всякого зазору спрашивайся у них. И аще некая посетит тя скорбь душевная, или телесная, или болезнь, или каков недуг, или пожар, или потоп, или татба, или разбои, или царьская опала, или властелин гнев, или поклеп, или оговор, или продажа зла и всякая неизбытнаа печяль,- о всех сих не отчяися, воспомяни своя предняя согрешения, еже зло содеях к Богу и человеком, и пролей теплыя слезы Милостивому Владыце и Пречистеи Богородици, и к всем святым, и прибегни к небурному пристанищу, к сим духовным наказателем, исповеж своя согрешения и скорбь со умилением и со слезами и сокрушением сердечным, могут тя уврачевати во всяких скорбех, и духовную ползу даровати. А еже повелят, сие твори от божественаго исправления, те убо суть слуги и молебники Небеснаго Царя, имеют дерзновение у Господа просити добрых и полезных душам и телом нашим, и оставления грехов и жизни вечныа.



Оглавление


Новый Домострой

на Главную страницу
на Главную
© Sergey I. Kravchenko 1993-2022
eXTReMe Tracker