Благословение от благовещеньскаго попа Селивестра возлюбленному моему единородному сыну Анфиму. Милое мое чадо дорогое! Послушай отца своего наказание, рождывшаго тя и воспитавшаго в добре наказании и в заповедех Господних, и сътраху Божию и Божественному Писанию изучену, и всякому закону християньскому, и промыслу доброму, во всяких торговлех и во всяких товарех наказану; и святительское благословение на себе имеешь, и царское государево жалование и государыни царицы, и братии его, и всех боляр, и з добрыми людми водишися, и со многими иноземцы великая торговля и дружба есть: все ее и доброе получил и умен еси совершити о Бозе. Яко же начато при нашем попечении, и по нас тако же бы Бог соблюл по тому жити. И законному браку сочтах тебе у добру родителю благодарную дщерь, и благословил есми тобя всякою святынею и честными кресты, и святыми образы, и благословенным стяжанием, яко же мню от праведных трудов, а в неведании Бог правитель. И ныне убо, сыну Анфим, предаю тебе и поручаю, и оставляю Создатели нашему доброму, блюстителю Исусу Христу и Его Матери, Пречистыя Богородица, и заступнице нашей, помощнице, и всем святым, яко же рече Писание: Подщися дети оставити наказаны в заповедях Господьних - лучше неправеднаго богатества: аще и в праведней убожестве, неже бы в неправедней богатестве. И ты, чадо, блюдися неправеднаго имения, а твори добрая дела, именье, чада, великую веру к Богу, все упование возлогаи на Господа: никито же, надейся на Христа, не погибнет! Прибегай всегды с верою ко святым Божиим церквам, заутрени не просыпай, обедни не прогуливай, вечерни не погреши и не пропивай павечерница и полунощница и часы в дому своем всегды по вся дни пети: то всякому християнину Божии долг. Аще возможно, по времени прибавишь правила, на твоем произволении, болшую милость от Бога обрящеши, а в церкви Божии и дому на правиле и на всяком молении и сам, и жену, и детей, и домочатцов стояти, со страхом Богови молитися и со вниманием слушати, отнюд в те поры ни о чем не беседовати, ни обзиратися, разве великия нужда, а говорити правило келейное и церковное единогласно, чисто, а не вдвое; священнический чин и иноческий почитай: те бо суть Божии слуги, теми очищаемъся от грехов, те имеют дерзновение молитися Господу о гресех наших и Бога милостива сотворят. Повинуйся, чадо, отцу духовному и всякому священническому чину во всяком духовном наказании, а жена тако же; в дом свои их призывай молитися о здравии за царя и государя и за царицу и чада их, и за братию его, и за сьвещенничсскии чин и мнишескии, и за вся християне. И о своем согрешениии и о своих домочадцев молебная совершай; и воду бы святили з Животворящего креста и со святых мощей, и с чудотворных образов. Аще болезьни ради за здрави и маслом свящают и в церквах Божиих - тако же твори: приходи с милостынею и с приношением за здравие и по родителех преставльшихься память твори со всякою чистотою, и сам воспомяновен будеши от Бога. Церковников и нищих, и маломожных, и бедных, и скорбных, и странных пришелцов призывай в дом свои и по силе накорми и напои и согрей, и милостыню давай от своих праведных трудов и в дому и в торгу и на пути тою бо очищаются греси: те бо ходатаи Богу о гресех наших. Имей, чада, истинную правду и любовь нелицемерную ко всем, не осужаи никого ни в чем, свои грехи рассужаи, како избыти их; чево сам не любиш, того и другу не твори, и храни чистоту телесную паче всего, да наступи на совесть свою, яко же на лютаго врага и возненавидя, яко же милаго душетленнаго дъруга; хмелного пития. Господа ради, отверзи от себе, пияньство в сем убо недуге, и вся злая ражаются обычаи от него. Аще от сего сохранит тя Господь, вся благая и полезная от Бога получиши, и от человек чесьтен будеши, и души своей просвет сотвориши на вся добрая дела.
    Воспомяни, чада, апостольское слово: не прельщаитеся - ни пьяница, ни блудник, ни прелюбодеи, ни содомленин, ни тать, ни разбойник, ни клеветник, ни хищник Царствия Божия не наследят! Аще которою страстию победился еси, чадо, или в которое грехопадение впал, о сем прибегни к Богу с теплою верою и ко отцу духовному з горкими слезами и плачися о гресех своих, и кайся истиние, еже таковая не творити, и заповед отца духовънаго храни и епитемью держи: милостив Господь праведных любит, грешных милует, всех зовет ко спасению, и паки храни и блюди себе в християньском жити праведном законе, удержи язык свои от зла и устие свои, еже не глаголати льсти, храни себе ото лжа и от похвалы, и от клеветы, и сам ни в чем не величайся: уничижи себе паче всех человек - узриши славу Божию. И всякого, чадо, не презри, во всякои нужи памятуй, чадо, како мы жихом век, никто не изыде от дому нашего тощь или скорбен, по силе вся потребная всякому человеку Бога ради давано и скорбново словом ползовано. Аще кому в чем возможно, и мы помогали Бога ради, и ссужали всячески, а нам невидимо Христос изобилно посылал милость Свою, всяких благих. А не помыслихом никогда на зло никому, разьве недоразумия, а без лукавства. Чадо, люби мнишескии чин, и страннии пришелцы всегда бы в дому твоем питалися, и в монастыри с милостынею и с кормлею приходи и в темницах и убогих и больных посещай и милостыню по силе давай. А домочадцов своих одевай и корми доволно, а жену свою люби и в законе живи по заповеди Господни: в неделю и в среду, и в пяток, и в празники Господни и Великий пост в чистоте пребывайте, в посте и молитве, и в покаянии и во всяких добродетелех, законъное жительство в славу Богу и в жизнь вечную, а любодеем и прелюбодеем судит Бог. Да сам, чадо, что твориши, того жену учи, всякому страху Божию и всякому вежьству и промыслу, и рукоделью, и всякому рукоделью и домашнему обиходу, и всякой порядне: умела бы сама и печи, и варити, и всякую домашнюю порядню умела, и всякое женьское рукоделье знала - коли сама все знает и умеет, ино умеет и детей и слуг всему научити и наряжати, и наказати во всем. И сама бы хмелново питья отнюд не любила, и дети и слуги у ней того не любили же, а всегда бы жена без рукоделия сама ни на час не была, разве немощи, а слуги у ней тако же. А в гостех будет или у ней гости, отнюд бы сама пьяна не была, а з гостьями беседа была бы о рукодельи и о домашней порядне, и о законном християньском житии, а не пересмеивайся и не переговаривала бы ни о ком ничево; в гостех и в дому песней бесовских и всякого срамословия и блядивых речей и блудных пословиц сама и слуги не говорила и не творила бы, того ни у кого бы не слушала, и волъхвов, и кудесников, и всякого чарования не знала бы и в домы не пущали ни мужиков, ни женок. Аще не внимает сего, всячески наказуи страхом и спасая, а не гневайся на жену, а жена на тебе. Наказуи наедине, да наказав примолви и жалуй и любя ея, тако же и детей и домочатцов своих учи страху Божию и всяким добрым делом, понеже тебе о них ответ дати в день страшного суда. Аще по нашему наказанию и по сему писанию учнете жити, велию благодать от Бога обрящете и жизнь вечную наследите и з домочатцы своими.
     Да держися, чадо, добрых людей во всяких чинех, и ревнуй добрым делом, вънимаи словеса добрые и твори я. Почитай часто Божественое Писание и влагай в сердце себе на ползу. Видел еси, чадо, како в житии сем жихом во всяком благоговении и сътрасе Божий и в простоте сердца и в церковном прилежании со сътрахом, и Божественным Писанием ползуючися всегда, и како были Божиею милостию от всех почитаем и всеми любим и всякому и в потребных уноровил и рукоделием и службою и покорением, а не гордынею, ни прекословием не осужах никого, не просмеивал, ни укаривал никого, ни бранивался ни с кем, и пришла от кого обида, и мы Бога ради терьпели и на себя вину полагали и тем враги други быша. И аще которою виною душевною или телесною согреших пред Богом и предо всеми человеки, и вскорь о том плакахся к Богу греха своего, и у отца своего духовнаго каяхся со слезами и умилне прощения прося, и заповеди его духовныя с любовию хранях, яко же повелит ми. И аще кто мя в моем прегрешении или в какове невежьстве обличит, или кто духовне накажет или кто в посмех поносит мя и укоряет, - вся сия с любовию приимах и себе внимах, аще по делом о всем о сем каяхся и от таковых дел удаляхся Богу поспешествующу ми. Аще что и неповинно и не по делу молва или поношение, или посмех каков или укоризна, или ударение,- во всем в том винихся и не оправдахъся пред человеки, Бог сие праведным Своим милосердием исправит. Воспоминах Еуаггельское слово: Любите враги ваша, добро творите ненавидящим вас, благословите кленущая вы, молите за творящая вам пакости, изгонящая вы, биющему тя в ланиту обрати ему и другую и от взимающаго ти ризу и срачицу не возбрани, и всякому просящему у тебе дай, от взимающаго твое не истязуи, аще кто тя поймет поприще едино - иди с ним две,- и паки еще воспоминая причастную молитву; Господи, даждь ми милость ненавидящим мя и враждующим ми и поношающим ми, такоже и оклеветающим мя, да никто же никако же от них мене ради, нечистаго и грешнаго, зло некако постражет ни в нынешнем, ни в будущем веце, но очисти их милостию своею и покрыи их благодатию своею, Благии! Тем всегда утешах себе, не погреших никогда же церковнаго пения от юности своея и до сего въремени, кроме немощи; ни нища, ни странна, ни убога, ни скорбна, ни печална никогда же презрех, кроме невидения, и в темницы болна и пъленена, и из работы должьна, и во всяких нужах по силе окупих, и гладных по силе кормих, работных своих всех свободих и наделих и, ины окупих из работы и на свободу попущах, и все те роботые наши свободны, и добрыми домами живут, яко як видиши, и молят за ны Бога и доброхотают нам всегда. А кто забыл -Бог его простит во всем. А ныне домочадцы наши все свободны живут по своей воли, видел еси, чадо мое, многих пустотных, сирот и работ и убогих, мужеска полу и женьска, и в Нове городе и зде, на Москве, вскормих и вспоих до совершена возраста, изучих, хто чево достоин, иных грамоте и писати, и пети, иных иконного писма, инех книжного рукоделия, овех серебреново, и иных всяких многих рукоделей, иных всякими многими торговли изучих торговать. А мати твоя многие девы и вдовы пусьтошные и убогие воспитала в добре наказании, изучила рукоделию и всякому домашнему обиходу и, наделив замужь давала, а мужий пол поженили у добрых людей, и все те, дал Бог, свободны, своими домами живут, многи во священническом и во дьяконьском чину, и в дьяцех, и в подьячих, и во всяких чинех: кто чево дородился и в чем соблаговолил Бог быти - овии рукодельничают всякими промыслы, а мнози - торгуют в лавках, мнози и гоздьбы деют в различных землях всяки овлями. А Божиею милостию во всех тех наших скормленикех и послуцех ни соромота, ни убыток, никакая продажа от людей, ни людей от нас, ниякажа ни с кем не бывала: во всем Бог соблюл по ся места. А от кого нам, от своих скормлеников, досада и убытъки многи и велики бывали, ино то все на себе понесено, нихто того не слыхал, а нам то Бог исполнил. И ты, чадо, чему же ревнуй и тако твори: на себе всякую обиду понеси и претерпи, Бог сугубо исполнит. Не познах другия жены, разве матери твоея; еже с нею обещахове, то и сотворих. О Бозе, соверши, Христе, христьянски сконьчати живот свои в заповедех Твоих! Живи, чадо, по християнскому закону во всих обычаех без лукавства и безо всякия хитрости ко всем, а не всякому веруй, доброму ревнуй, лукавых и законопреступных во всяких обычаех не люби. А законной брак со всяким опасением храни до коньчины живота своего, чистоту телесную храни, кроме жены своей не знай никого, пьянственаго недуга тако же: в двух сих главизнах вся злая до ада преисподняго: и дом пуст - имению тщета, и от Бога не помилован будет, и от людей безчестен и посмеян, и укорен, и от родителю прокълят. Аще, чадо, тебя от сего зъла Господь сохранит, закон сохраниши по заповеди Господни, от хмелного питья воздержися, и во всяких добродетелех живеши, яко же есть богобоязнивии люди, и ты от Бога помилован будеши, от людей честен. И исполнит Господь дом твои всякою благодатию. И еще помянути: гостей приезжих у себя корми, а на суседстве и з знаемыми любовно живи, о хлебе и о соли и о доброй зделке и о всякой ссуде. А поедешь куды в гости - поминки не дороги, вози за любовь, а в гости от стола есть подавай домовным государем и приходящим и их с собою сажаи за стол и питеица такоже подавай. А маломожным милостыню давай. Аще сия твориши, то везде тебя ждут и стречают, а в путь провожают - от всякого лиха берегут: на стану не покрадут, а на дороге не розорят, того ради кормят добраго до добро, а лихова от лиха, тот ся на добро обратит, во всем в том убытка нет в добрых людех. Хлеб-соль - заемное дело, а поминъки такоже, а дружба в век, а слава добрая. А на дороге и з пиру и в торговле отнюд сам брани не зачни, а кто излает - терпи Бога ради, а от брани уклонися: добродетель злобу преодолевает. Господь бо гордым противится, смирена Бог любит, а покореному Бог благодать дает. Аще людем твоим лучитца с кем брань где ни будь, и ты на своих брани, а кручиновато дело - и ты и ударь, хоти и твой прав: тем брань утолиши, такоже убыток и вражда не будет. Да еще недруга напоити и накормити хлебом да солью, ино вместо вражды дружба. Вспоминай, сыну, великое Божие милосердие к нам и заступление от юности и до сего времени.
    На поруку не давал никого, ни меня не давывал никто во всяких вещех, и на суде не бывал ни с кем, ни искивал, ни отвечивал. А видел еси сам, в рукодеях и во многих бо всяких вещех мастеров всяких было много: иконники, книжные писцы, серебреные мастеры, кузнецы и плотники и каменьщики, и всякие и кирпищики, и стеньщики, и всякие рукоделники; денги им даваны на рукоделье напередь по рублю и по два, и по три, и по пети, и по десяти, и болши; а многи были плуты и бражники, и со всеми теми мастеры в сорок лет, дал Бог разойтися без остуды и бес пристава и безо всякия кручины, все то мирено хлебом да солью, да питьеме, да подачею и всякою добродетелью, да своим терпением. А сам у кого купливал, ино ему от мене милая розласка, без волокиды платежь, да еще хлеб да соль сверх, ино дружба в век, ино всегда мимо мене не продаст и худого товару не даст, и у всего не доймет. А кому што продавывал, все в любовь, а не в оман; не полюбит хто моего товару, и аз назад возму, а денги отдам. А о купли и о продажи ни с кем брань и тяжба не бывала, ино добрые люди во всем верили, и зде, и иноземцы - никому ни в чем не сълыгивано, не манено, ни пересрочено, ни в рукоделии, ни в торговли, ни кабалы, ни записи на себя ни в чем не давывал, а ложь никому ни в чем не бывала. А видел еси сам, какие великие сплетъки со многими людьми были, да все, дал Бог без вражды коньчалося. А ведаеш и сам, что не богатеством жито з добрыми людми, правдою да ласкою, да любовию, а не гордостию, и безо всякия лжи. Чадо мое любимое, Анфим, еже тя поучах и всячески наказывах о всяком добродетелном и богодохновенном житии, и грубое сие писание худаго моего учения предах ти, молю тя, чадо, Господа ради и Пречистой Богородицы и великих чюдотворьцев, почитай себе с любовию и со вниманием и напиши на сердцы своем и, прося у Бога милости и помощи, и разума, и крепости, и вся предиреченная с любовию и делом, тако же по сему писанию и жену поучай и наказуи, такоже и детей своих и домочадцов всех учи страху Божию и добродетелному житию. И аще сам вся сия твориши, и жену, и детей, и раб, и рабынь, и всех ближних своих и знаемых научиши, и дом свои добре устроиши, вся благая от Бога обрящеши, и жизнь вечную наследиши со всеми одержимыми тобою. Аще, сыну, моего моления и поучения не внемлеши, и по сему писанию не учнеши жити, яко же и прочий добрые люди и боязнивии мужие, и отца духовнаго заповеди не учнеш хранити и от богодухновенных мужей не пользуешися поучением и почитанием Святаго Писания и хрисгияньскаго праведнаго закона не храниши, и о домочатцех своих не радиши, и яз твоему греху не причастен, сам о себе и о домочатцех своих и о жене ответ даси в день страшнаго суда. Аще, чадо мое возлюбленное, и малые сия заповеди худаго моего учения сохраниши, и по нашему пути поидеши, и словес моих послушаеши, и делом творити начнеши и будеши сын Свету и наследник небесному Царствию, и будет на тебе милость Божия и Пречистыя Богородицы и заступницы нашея, и великих чюдотворьцев Николы, Петра, Алексея и Сергия, и Никона, и Кирила и Варлама, и Александра, и всех святых и родительская молитва, и мое вечное на тебе благословение отныне и до века, и благословляю тебя, чада своего, и прощаю в сем и в будущем и буди на тебе милость Божия, и на жене твоей и на чадех твоих, и на всех ваших доброхотах отныне и до века.
    Чадо мое единородное и любимое, Анфим, производил Бог и благочестивыи и православный царь государь, велел послужити тебе в своей царской мазне у таможенных дел, и ныне молю тя, чадо, и со слезами глаголю: Господи ради памятуй царьское наказание, прося у Бога помощи и разума от всея ума и от всего помышления, служи верою да правдою безо всякия хитрости и безо всякого лукавства во всем государьском; другу не дружи, недругу не льсти, и волокида бы людем ни в чем не была, всякого отделай с любовию без брани; а не поспеется, и ты добрым словом отвещаи и, присрочив, не изволоча отпусти; а в торговли прямую розласъку чини, душевредная бы тъвоя служба не была государю ни в чем, а сам благословленным государьским уроком сыт буди, и все бы у тебя государьское было всегда в счете и смете, в писме, и приход, и расход, и к казначеем буди послушен, а с товарищами советен, а к подьячим и мастером и к сторожем грозен и любовен, и ко всяким людем приветен; а победных и скорбных, и нужных, и полонеников отнюд без волокиды управ и от собя по силе накорми и напои, и милостыню дай, по человеку смотря; а случится суд, всякому человеку, богату и убогу, другу и недругу, аще свое дело истинно и праведно, без волокиды и безо всякия хитрости соверши, по Еуаггельскому словеси: Не на лица судите сынове человечестии, но праведен суд судите: им же судите судом, судится вам, и в сю же меру мерите, возмерится.
    Слава свершителю Богу ныне и в век века, аминь.