65.
УКАЗ О ВСЯКИХ ОВОЩАХ О РОЗНЫХ, КАК ИХ СТРОИТИ И ДЕЛАТИ

Обарнои мед взяти в семеро сырцу, водою влеть тепло, да розсытя мед процедити ситом начисто, без вощин, да положыти в тот мед вару всякой пуд по полумере хмелю. А варя тот мед, пена снимати ситом, чтоб было в котле чисто, да уваря тово меду половину, да ис котла простудити леть тепло, да сложыт мед в мерник чисто, без вощин, да укрой хлеба натерти дрожжыма с патокою, да припеч у печи, да положыт в тот мед в мерник, да квасити. А как соиметца мед киснути гораздо, ино его и сливати тотчас в бочки, чтоб не окис.

Белой мед сытити. А белой мед сытити, выбирати патока белая чистая, да убить патока мутовью гораздо, чтоб не было кусья медового мелково. А взяти мед в четверо розсытити водою — леть тепло; а вару положыти на всякой пуд по четверте мере хмелю, да дрожжыма наквасити, а как мед киснет— ино дрожжы снимати с меду ситом до чиста, а как поспеет — так и сливати в бочки.

Патошнои мед сытити. Паточной мед сытити, взяти в пятеро патоки, а розсытити водою леть тепло, да процедити чисто, да сложыти в мерник, а вару положыти — на три пуда мера хмелю, да дрожжыма наквасити; а как мед киснет — ино дрожжы снимати с меду ситом до чиста, а как поспеет— так и сливай.

Простои мед сытити. А простои мед взяти сырцу в шестеро, розсытить водою леть тепло, да процедити чисто, да положыть на мерник, а положыти вару на всякой пуд по полумере хмелю, да дрожжами наквасити; а как мед киснет — ино дрожжы снимати с меду ситом до чиста, а как поспеет — так и сливати в бочки. Боярской мед сытити. А боярской мед сытити — сняти вощина до патоки, да взяти в шестеро, да розсытить горячею водою, а вару положыти на всякой пуд по мере хмелю, да наквасити дрожжыма, а процедити чисто без вощин, а киснути в мерниках неделя да сложить в бочки; а стояти в бочках неделя же, да тот мед сцедити з дрожжей да положыти выную бочку, без дрожжей, да подкормити патокою…



Оглавление


Новый Домострой

на Главную страницу
на Главную
© Sergey I. Kravchenko 1993-2022
eXTReMe Tracker