А в пиварнюю поварню на пиво и на брагу, и на кислые щти солоду, и муки, и хмелю отдати — то бы было в писме измерено и во счете. А коли пиво затирают ячное, или овсяное, или ржаное, или хмель парят, и у квашеня, и у сливаня дозирати самому, всегды бы было брежно, и не искрадено, и не испрокужено, и за посмех не выпито. А коли пиво варят и силен толке солод, ино бочку, или болши, другово пива нарядят, а после всякого пива на гущу поливают, воды взогрев, ведр с тритцать и с сорок, а на ячную гущу 50 и 60, взогрев, влити, или и болши, по вари смотря. И тот исток приквасить, добре хорошо семьи пити, а ис перваго последу приквасив, на кислы шти пригодитца. А уксус ставити из доброго сусла, и в брежение и в тепле держать, и в чистоте приходить к нему. А хмелины пивные копити на винную брагу и беречь лете — или сушить или на леду с суслом, чтоб не испортити. А дружжы тако ж копити на винную брагу и в перепуск, и брежно держати: а на тот запас ветшаные суды пригожаються, толке были в запасе и перекреплены. А мед сытит сам и, как кишет, хоромина та запечятати, самому толке назирать, хто бы тут не ходил, а сливати самому ж, а на сливане бы не пили. А вино курити, самому ж неотступно быти, или кто верен — и прям тому приказати, а у перепуска потому ж, и крепчяя беречи, да смечять по колку ис котла араки перво, и другой последу уточять, а у перепуска потому ж смечять, колке ис котла укурит первого, и среднего, и последняго. А на погреб, и на ледник, и в сушило, и в житници без себя никакова не пущати, везде самому отдавати, и отмерити, и отвесити; и сколке кому чего даст, то все записати.