А у которого человека огородец есть, и кто пашет огород, сам ли государь дозирает или государыня, или кому приказано. Пер­вое городба с весны перекрепити, чтоб в огород ни собаки, ни свини — и всякое животине, ни куром взойти не было ни с чюжего двора, ни с своего, ино яблоням и всякому плоду пакости нет, а с суседы — остуды, толке от тебя твердо, твоей животине к ним неумет, а их — к тебе. А двор бы был потому ж везде бы крепко горожен или тынен, а ворота всегды приперты, а к ночи замнуты. А собаки бы сторожливы, а слуги стерегли ж, а сам государь и государыня послушивают ночи. А огород всегда бы был замкнут, да кому приказано, тот бы его всегда берег день и ночь, в нем всего дозирал. Как гряды весне копать, а навоз класти, а навоз зиме запасывати, и к садилом на дыни паровые гряды готовити, и всякие семена водити у себя и, посадив или посеяв всякие семена и обилье, в пору поливати, и укрывати, и от морозу всегды беречи, и яблони подчищати, и суша вырезывати, и подчи розсажывати, и пенки, и почки прививати, и гряды всякое обилие полоти, и капуста от червя и от блохи беречь и обирати и отрясывати. А возле тына, около всего огорода, борщу насеяти, где кропива ростет, и с весны его варити много про собя, и того в торгу не купишь, и нужному даст Бога ради, а толке у молода человека, ино и упродаст на иную вологу. И как насадит капусты и свеклы, и поспеет, капуст­ное листье варити, и как учнет витца в клуб, и толке часто, ино изретка секучи варити, а лист обломываючи животину кормити. А в ту пору и до осени, борщь режучи, сушити и в пленици плести, ино всегды пригодитца — и в даль, и в год; а капуста во все лето варити и свеколню. А в осень капусту солити, а свеколнои росол ставити, а огурци солить же. А лете прохлажаетца: ест дыни и стручье, морков, огурци и всякой овощ, а Бог послал поболши чего, ино и упродаст. А сад розводити про собя, ино привитка от древа до древа, по 3 сажени и болши, ино яблони ростут велики, и обилю и всяким овощем не помешает рости, а как будет густо от ветя, под древнем не ростет ничто, ино борщу насеят, ино всегды плод. А падушок яблочних и что поспело: огурци, и дыни, и всякой овощ в пору бы обирати, что про собя сьести или поблюсти, или в год поставити, и что солити, и квас ставити, яблока и груши или в патоке, и ягодный вишневый морс…