А плате и рубашки и убрусы на себе носити брежно по вся дни, не изваляти, не изсуслати, не излити, и на мокре не сести и не положити, все то снимаючи с себя класти брежно, и бречи того накрепко, и слуг учити тако ж.
    А самому государю и государыне и детем и слугам каково лучитца дело зделати, ино в плате в ветчаном изделав, и оболочися в плате повседневное и сапоги. А в праздники в ведро и при людех, или к церкви ити, и в гости, ино лутчее плате надеть изутра, да брежно ходити, от грязи и от дождя и от снега бречи, и питием и ествою и салом не изсуслати, на руде и на мокре не сести. От праздника, и от церкви, или из гостей пришед, лутчее плате с себя снем, пересмотрети, и высушити, и вымяти, и вычистити, и хорошо укласти, где живет. А повседневное всякое плате и верхнее и нижнее, и сапоги, - всегда бы было измыто, а ветшаное иззаплачено и изшито, ино и людем пригоже посмотрети, и себе мило и прибылно, и сиротине дати, ино спасение. А платие всякое и всякой наряд, и склатчи и свертев хорошо, положити в сундук или в коробью, и за замком всегда бы было, ино всякой притчи не страх.