А толко люди у себя держати не по силе и не подобытку, и не удоволити его ествою и питием и одежею, или которой нерукоделен, и собою не умеет промыслити,- ино тем слугам, мужику и жонке и девке, у неволи заплакав, красти и лгати и блясти, а мужиком розбивати и красти, и в корчме пити, и всякое зле чинити,- и тому безумному государю и государыни от Бога грех, а от людей посмех, и не суседство со всяким, а от судей продажа, и тщета дому, и сам обнищает за скудость ума. Ино достоит всякому человеку людей держати по промыслу и по обиходу, как можно кормити и поити и одевати, и во всяком покои удоволити, и в страсе Божий и в добре наказании их имети. И аще таковых людей у себя имееши, сам от Бога благодать обряшеши и те души спасеши. А не по силе людей не держати и их в работу не продавати, но доброволно отпущати и как возможно и наделити: от Бога мзда, а души спасение.