16.
КАКО МУЖУ С ЖЕНОЮ СОВЕТОВАТИ, КЛЮЧНИКА ПРИЗЫВАТИ, О СТОЛОВОМ ОБИХОДЕ И О ПОВАРНЕ И О ХЛЕБНЕ

По вся дни, и по вся вечеры исправя сии долг душевный, во утри воставати к позвону, и после пения мужу з женою советовати о устроении домовнем, на ком что положено, и кому которое дело приказано ведати, и тому наказати, что коли устроити, ести и пити про гость или про себя. Или ключник по государеву наказу прикажет, что купити на обиход, и, купив, что принесет, то сметити, и правды смотрети в купле. А хто покупает на дворои обиход всякой запас, на еству рыбу и мясо, и всякую вологу, ино давати ему денег на неделю или на месяць, да как выдаст денги, да и отчет даст государю в том, и опять емлет. Ино все ведомо: и проесть и всякая изтрава, и его служба. А повару отдаст, что варити, и хлебнику на приспехи на всякие потому ж отдаст. А все бы то было в памяти, что государю сказати. А в поварню ества мясная и рыбная и печи и варити отдати в число ж, и как чего государь повелит, и на колко блюд, да испечено и сварено у повара взять в число ж. А на стол всякая ества ставити по государеву наказу, по гостем смотря, а хлебной приспех потому ж дати в число, и взяти в число ж, и всякая ества, что от стола останетца, цела и едена, и ух, и приспеху всякого, целую еству перебрати, и почятое - особе, и мясное и рыбное, и покласти в суды в чистые в твердые, и покрыти и в лед всечь. А начятая ества, и всякие останки давати на обиход, как по пригожу, а целое блюсти про государя и про гости. А питье в стол давати по приказу, по гостем смотря, и без гостей, а государыни в стол брага или квас. А столовые сосуды: оловяники и братины и ковши, уксусници, перечници, росолници, солоници, ставци, блюда, лошки, скатерти, фаты,- всегда бы было чисто и готово на стол и на подставци. А изба и выметены или горници, и устроины, и образы по стенам уставлены по чину и но подобию, и столы бы и скамьи вымыты и вытерты, и ковры по лавкам розстелены. А уксус, и огуречной росол и лимонной, и сливной, все бы цежено в ситце, и огурци, и лимоны, и сливы очищены и перебраны, и на столе бы было чисто и искусно. А рыба прутовая и всякаа вялая, и студень постная и мясная, икра и капуста - очищено и по блюдом розскладено до стола, и изготовлено. А питье бы всякое чисто жив ситце бы цежено. А ключники бы и повары, и хлебники, и всякие стряпчии до стола бы поели и испили лехково питья немного, и оне стряпают не в кручине. И в платьеце бы опрянулися, в каково им государь повелит, и устроили себя чистенко, и во всякой бы стряпне ходили чисто и брежно, которому што вручено от государя. А у клучника бы и у всех стряпчих всякая порядна мыта и чиста, и брежна, а у государыни и у ее слуг потому ж. А еству и питие на стол понести осмотря, чтобы то судно чисто было, в чем несет, и дно подтерто, и ества и питие чисто ж, без пороха и без плесни, и без пригарины; и осмотря ставити, и поставив еству или питие, и туто не кашляти, ни плевати ни сморкати, отшед на сторону вычистити нос, или выкашлятся, ино не скаредно и вежливо, а сморъкнуть или плюнуть заворотяся да и потерти ногою; так всякому человеку пригоже.



Оглавление


Новый Домострой

на Главную страницу
на Главную
© Sergey I. Kravchenko 1993-2022
eXTReMe Tracker