А в которыя любо праздники обещанию своему, или немощи ради, или маслом кого свящати, да призывают священнический чин в дом свои, елико по силе, и молебная совершають о всяком прошении, и молят за царя и великаго князя, имярек, всея Руси самодержьца, и за его царицю великую княгиню, имярек, и за их благородная чяда, и за братью его, и за боляре, и за все христолюбивое воиньство, иже победу на враги, и о плененых свободе, и о святителех, и о всем священническом и иноческом чину - и о всяком прошении, и за вся християне, и о домовнем - муже и жене, и о чядех, и о домочядцех, и о всех полезных им, аще когда требуют.
     И воду святят Животворящим Крестом, и с чюдотворных образов, и с честных святых мощей, и за болящаго и масло свящают, в здравие и исцеление. А коли масло свящати над болящим в дому, да призовут седми священников или множе, а дияконов колко лучитца. А масло свящают и все действуют по уставу, и кажение по всем храмом от диякона, или от попа, и святою водою кропление, и Честным Крестом осенение от болшаго попа, и вкупе в дому сем благодаряще Бога. По Божественеи же Литургии .трапезу поставляют и едят, и пьют священнически чин и мнишески, и прочий приходящий, а маломожнии туто ж и удовлены всячески и отдарены, отходят в домы своя благодаряще Бога. Тако ж и по родителех преставлешихся память творити; в святых Божиих церквах и в монастырех понахиды соборне пети, и Божественая Литургия служити, и в трапезе братия кормити, за упокой, и за здравие, и в дом свои призывати, и кормити, и покоити, и милостыня творити.
    А вода святити генваря 6 и августа 1 и - всегда единым Животворящим Крестом. Погружает его 3 ж в чяши святитель, или священник, глаголюще троп.: Спаси, Господи, люди Своя, 3 ж, а на Богоявление--троп.: во Иердани крещающутися, Господи, 3 ж, а на блюде святые кресты и иконы, и чюдотворныя честныя мощи. И ис чяши выимая крест, над блюдом держит, и со креста вода идет на ту святыню, и по погружении креста, и по освящении святыя воды, помазует губкою, омакая в ту святую воду честныя кресты, и святыя иконы, и чюдотворныя мощи, елико суть во святем храме или в дому, глаголюще тропари коемуждо святому, святую икону помазующе. А с тех икон губку выжимати в ту ж святую воду и паки иные святыни помазати такожде. И тою святою водою кропити олтарь и весь святыи храм крестаобразно, и в дому тако ж по всем храмом кропити, и народ весь. И достоини верою помазуються, и пьют ея на исцеление и очищение душам и телом, и во оставление грехов, и в жизнь вечную.