В монастыри, и в болници, и в пустыни, и в темници заключенных посещай, и милостиню по силе всяких потребных подавай, елико требуют; и види беду их, и скорбь, и всякую нужу, и елико возможно помагаи им, и всякого скорбна, и нища, и бедна и нужна, не презри, и введи в дом свои, напои и накорми, согрей, одежи со всею любовию и чистою совестию; теми молитвами Бога сътвориши себе милостива, и свободу грехов получит. А родителем твоим преставлешимся память твори, к церквам Божиим приношение на понафиду и на литургию; и в дому по них кормлю твори, и нищим милостину давай,- и сам от Бога помилован будеши.