Благословляю аз, грешный, имярек, и поучяю, и наказую, и вразумляю единочядаго сына своего, имярек, и его жену, имярек, и их домочядцов - быти во всяком християнском законе, и во всякой чистой совести и правде, с верою творяще волю Божию, и хранящи заповеди Его, себе утвержающе во всяком страсе Божии и в законном жительстве, и жену поучяюще, тако ж и домочядцов своих наказующе, не нужею, ни ранами, ни работою тяшкою, имеюще, яко дети во всяком покое: сыты и одены, и в теплом храме, и во всяком устрое. И вдаю вам християньскому жителству писание, на память и вразумление вам и чядом вашим. Аще сего моего писания не внемлете и нашего наказания не слушаете, и по тому не учнете жити, и не тако творити, яко ж есть писано, сами за собя ответ дадите в день страшнаго суда, и аз вашим винам и греху не причястен, кроме моея душа. Аз о сем о всяком вас благочинии благословлял, и плакал, и молил, и поучял, и писанием предлагал вам, и аще восприимете сие мое худое учение и грубое наказание со всею чистотою душевною и, прочитая, прося у Бога помощи и разума по елико возможно, как Бог вразумит вас, и начнете делом творити вся си,- будет на вас милость Божия и Пречистыя Богородици и великих чюдотворцов и наше благословение от ныне и до века. И дом ваш, и чада ваши, и стяжание ваше, и обилие, что вам Бог подаровал от нашего благословения и от своих трудов,- да будет благословленно и исполнено всяких благ во веки, аминь.